ধূলিস্যাৎ বচ্চন পৰিয়ালৰ গৰিমা! ‘পানামা পেপাৰ্ছ’ সম্পৰ্কত জেৰাৰ সন্মুখীন হ’ব ঐশ্বৰ্য

ডিজিটেল ডেস্ক : ধূলিস্যাৎ হোৱাৰ দিশে বচ্চন পৰিয়ালৰ গৰিমা! পানামা পেপাৰ্ছৰ বিতৰ্কই পুনৰ মূৰ দাঙি উঠি কালিমা সানিলে বচ্চন পৰিয়ালৰ গৰ্ব আৰু গৰিমাত। বহুচৰ্চিত এই পানামা পেপাৰ্ছ সম্পৰ্কত এনফ’ৰ্চমেণ্ট ডাইৰেক্টৰেটে বচ্চন পৰিয়ালৰ বোৱাৰী ঐশ্বৰ্য ৰায় বচ্চনক চমন জাৰি কৰাৰ বাতৰি প্ৰকাশ হোৱাৰ পাছতে দেশজুৰি চৰ্চা আৰম্ভ হৈছে। পানামা পেপাৰ্ছ সম্পৰ্কত ইডি-এ ৪৮বছৰীয়া অভিনেত্ৰীগৰাকীক জেৰা কৰিব বিচাৰিছে। বিদেশত থকা সম্পত্তি সম্পৰ্কীয় গোচৰত বচ্চন পৰিয়ালৰো নাম সাঙোৰ খাইছিল। অভিষেক বচ্চনৰ পত্নী তথা অমিতাভৰ বোৱাৰী ঐশ্বৰ্যক ইয়াৰ আগেয়েও দুবাৰকৈ চমন দিছিল ইডি-এ। কিন্তু ইডিৰ এই চমনৰ পাছত দুবাৰকৈ অধিক সময় বিচাৰিছিল তাৰকাগৰাকীয়ে। এয়া তৃতীয়বাৰলৈ তেওঁলৈ জাৰি কৰা হ’ব চমন।

উল্লেখ্য যে, পানামা পেপৰ্ছ সম্পৰ্কীয় তদন্ত ২০১৭ চনতে আৰম্ভ কৰিছিল এনফ’ৰ্চমেণ্ট ডাইৰেক্টৰেটে। বচ্চন পৰিয়াললৈ সংস্থাটোৱে চমন জাৰি কৰি ২০০৪চনৰ পৰা বিদেশলৈ প্ৰেৰণ কৰা ধনৰ খতিয়ান বিচাৰিছিল। ভাৰতীয় ৰিজাৰ্ভ বেংকৰ ‘লিবেৰালাইড ৰিমিটেন্স স্কীম (এলআৰএছ)ৰ আধাৰত এই চমন জাৰি কৰা হৈছিল তাৰকা পৰিয়ালটোলৈ। উল্লেখ্য যে, ২০১৬ চনত এই পানামা পেপাৰ্ছ চুৰি হোৱা আৰু দেশৰ সংবাদ মাধ্যমত এই সম্পৰ্কীয় তথ্য প্ৰকাশৰ পাছতে তোলপাৰ লাগিছিল। বিশ্বৰ বিভিন্নজন প্ৰভাৱাশালী আৰু ধন্যঢ্য লোকৰ লগতে এই তালিকাত নাম সন্নিৱিষ্ট হৈছিল বচ্চন পৰিয়ালৰো। এই পানামা পেপাৰ্ছত ৩০০ৰো অধিক লোকৰ নাম সন্নিৱিষ্ট হোৱা বুলি প্ৰকাশ পাইছিল। পানামা পেপাৰ্ছৰ এই বিতৰ্কই এতিয়া ঐশ্বৰ্যলৈ চমন জাৰি কৰাৰ পাছত নতুন ৰূপ পালে।

আৰু পঢ়কঃ গে’ বিবাহ! ১০ বছৰীয়া প্ৰেমৰ অন্তত বিবাহপাশত আৱদ্ধ অভয় আৰু সুপ্ৰিয়