ডিজিটেল ডেস্কঃ চেলিব্ৰিটীসকলক প্ৰায়ে সংবাদ শিৰোনামত থকা দেখা যায়। টলিউড হওক বা বলীউড, অগণন অনুৰাগীয়ে সদায় চেলিব্ৰিটীসকলৰ নানা কাহিনীৰ সন্ধানত থকা দেখিবলৈ পোৱা যায়। পিছে ৰূপালী পৰ্দাৰ নায়ক-নায়িকা সকলৰ জীৱন কিন্তু ইমান সুখকৰ নহয়। তেওঁলোকৰ ব্যক্তিগত জীৱনৰ আঁৰতো থাকে বহু দুখৰ কাহিনী।
বলীউডৰ ড্ৰীম গাৰ্ল বুলি যদি হেমা মালিনীক ধৰি লোৱা হয় তেতিয়া হ’লে বলীউডৰ ডিম্পল গাৰ্ল হ’ল প্ৰীতি জিণ্টা। তেওঁৰ মুখত বিৰিঙি উঠা হাঁহিটোৱে অনুৰাগীৰ বুকুত হেজাৰ ধুমুহাৰ সৃষ্টি কৰে। বহুতে হয়তো নাজানে যে, প্ৰীতি জিণ্টাই অতি কম বয়সতে মডেলিঙৰ জৰিয়তে নিজৰ কেৰিয়াৰ আৰম্ভ কৰিছিল। বিজ্ঞাপনত কাম কৰাৰ সমান্তৰালকৈ ১৯৯৭ চনত ‘দিল ছে’ চিনেমাখনৰ জৰিয়তে আত্মপ্ৰকাশ কৰে এইগৰাকী নায়িকাই।
স্মৰ্তব্য যে, কণমানি প্ৰীতিয়ে মাত্ৰ ১৩ বছৰ বয়সতে এটা পথ দুৰ্ঘটনাত হেৰুৱাইছিল পিতৃ দুৰ্গানন্দ জিণ্টাক। তেওঁৰ পিতৃ ভাৰতীয় সেনাৰ বিষয়া আছিল। যদিও সেইদিনা তেওঁৰ মাতৃ গাড়ীখনত আছিল, তথাপি তেওঁ কেনেবাকৈ ৰক্ষা পৰিলেও শয্যাশায়ী মাতৃ নীলপ্ৰভা জিণ্টাৰ মৃত্যু হয় দুবছৰ পাছতেই। তেতিয়াৰ পৰাই অকলশৰীয়া হৈ পৰিছিল প্ৰীতি জিণ্টা।
সৰুতে পিতৃ-মাতৃক হেৰুৱাই জীৱন সংগ্ৰামত জপিয়াই পৰিছিল প্ৰীতি। অকলে আগুৱাই যোৱা জিণ্টাই কিন্তু জীৱন যুদ্ধত তেওঁ কেতিয়াও হাৰ মনা নাছিল। লক্ষ্যৰ প্ৰতি দৃষ্টি নিবদ্ধ ৰাখি আগুৱাই গৈছিল হাঁহিমুখে। আৰু সেইবাবেই আজি তেওঁ এগৰাকী সফল বলীউড অভিনেত্ৰী।
কিন্তু ব্যক্তিগত জীৱনত প্ৰীতিয়ে চেৰ’গেচিৰ জৰিয়তে যমজ সন্তানৰ মাতৃ হৈ মাতৃত্বৰ গৌৰৱ অৰ্জন কৰিছে। কিন্তু কেৱল দুটা সন্তানে নহয়, ৩৪টা সন্তানৰ মাতৃ প্ৰীতি জিণ্টা। ২০০৯ চনৰ জন্মদিনত হৃষিকেশৰ পৰা ৩৪টা সন্তানৰ দায়িত্ব লৈছিল বলীউডৰ অভিনেত্ৰীগৰাকীয়ে। তেতিয়াৰ পৰা তেওঁ এই শিশুসকলক নিয়মিতভাৱে লগ পাই তেওঁলোকৰ যত্ন লৈ আহিছে।
ব্যক্তিগত জীৱনৰ উপৰি প্ৰীতি জিণ্টাই নিজৰ অসাধাৰণ অভিনয় দক্ষতাৰে হিন্দী মনোৰঞ্জন জগতখনত নিজৰ ভাবমূৰ্তি বজাই ৰাখিছে। ‘কই মিল গয়া’; ‘কভী অলবিদা না কেহনা’; ‘বীৰ জাৰা’কেক ধৰি কেইবাখনো ছুপাৰহিট ছবিত প্ৰীতি জিণ্টাই নিজৰ অভিনয় দক্ষতাৰ প্ৰমাণ দিছে।
Continue Reading
