দিল্লী চৰকাৰৰ সিদ্ধান্ত; নিষিদ্ধ কৰিছে ফটকাৰ উৎপাদন, বিক্ৰী আৰু ব্যৱহাৰ

ৰাজধানী চহৰ দিল্লীত বৰ্ধিত বায়ু প্ৰদূষণৰ প্ৰতি লক্ষ্য ৰাখি সোমবাৰে দিল্লী চৰকাৰে ফটকা উৎপাদন, বিক্ৰী আৰু ব্যৱহাৰত নিষেধাজ্ঞা আৰোপ কৰিছে। দিল্লীৰ অৰবিন্দ কেজৰিৱাল চৰকাৰৰ পৰিৱেশ মন্ত্ৰী গোপাল ৰায়ে ঘোষণা কৰিছে যে বিগতবৰ্ষৰ দৰে দেৱালীৰ সময়ত ফটকা ব্যৱহাৰ নিষিদ্ধ কৰা হৈছে।           

 

বায়ু প্ৰদূষণৰ সৈতে মোকাবিলা কৰিবৰ বাবে চৰকাৰৰ দায়বদ্ধতাৰ প্ৰতি লক্ষ্য ৰাখি কৰি ২১টা মূল ক্ষেত্ৰক সামৰি ‘শীতকালীন কাৰ্য্য পৰিকল্পনা’ প্ৰস্তুত কৰা হৈছে বুলি সদৰি কৰিছে৷ এই পৰিকল্পনা অধীনত প্ৰদূষণ নিয়ন্ত্ৰণৰ লক্ষ্যৰে বিভিন্ন অভিযান চলোৱা হ’ব৷ আৰু ইয়াৰ সফলতা নিশ্চিত কৰিবৰ বাবে চৰকাৰে জনসাধাৰনৰ সৈতে ঘনিষ্ঠভাৱে কাম কৰি যাব বুলি সদৰি কৰে পৰিৱেশ মন্ত্ৰী গোপাল ৰায়ে৷ সমূহ দিল্লীবাসীক ফটকা ব্যৱহাৰ কৰাৰ পৰিৱৰ্তে লেম্প জ্বলাই মিঠাই বিতৰণ কৰি দিপাৱলী উদযাপন কৰা কৰিবলৈ আহ্বান জনাইছে। আমি একত্ৰিত ভাৱে প্ৰদূষণ হ্ৰাস কৰাৰ লগতে পৰিৱেশ সুৰক্ষাৰ দায়িত্ব গ্ৰহণ কৰিব পাৰোঁ। প্ৰতিজন নাগৰিক 'প্ৰদূষণ যোদ্ধা' হয় তেন্তে আমি বায়ু প্ৰদূষণৰ ফলত হোৱা স্বাস্থ্যজনিত সমস্যা সমূহ ৰোধ কৰিব পাৰিম।’ বুলি মন্তব্য আগবঢ়াই। 

নিষেধাজ্ঞা কঠোৰভাৱে কাৰ্যকৰী কৰিবৰ বাবে দিল্লী আৰক্ষী তথা দিল্লী প্ৰদূষণ নিয়ন্ত্ৰণ সমিতি আৰু ৰাজহ বিভাগৰ সহযোগত পৰিকল্পনা প্ৰস্তুত কৰা হ’ব বুলিও জানিবলৈ দিয়ে মন্ত্ৰীগৰাকীয়ে।উল্লেখযোগ্য যে ২০২৫ চনৰ ১ জানুৱাৰী লৈ বাহাল থাকিব এই নিষেদ্ধাজ্ঞা৷