ডিজিটেল ডেস্ক : দেশৰ লগতে বিগত দুই-তিনিদিনত দিল্লীতো হ্ৰাস পাইছে ক'ভিডৰ প্ৰকোপ৷ বৰ্তমান পৰিস্থিতিলৈ লক্ষ্য কৰিয়ে দিল্লীত সপ্তাহান্তিক লকডাউন উঠাই লোৱা হৈছে বুলি আজি ঘোষণা কৰে৷ লগতে যুগ্ম-অযুগ্ম সংখ্যাৰ বাধাসমূহ আতঁৰোৱাৰ লগতে ৰেষ্টুৰেণ্ট আৰু চিনেমা হলসমূহত ৫০শতাংশৰ অনুমতি প্ৰদান কৰে৷ ৰাজ্যখনত ক'ভিড সংক্ৰমণ পূৰ্বৰ তুলনাত হ্ৰাস পোৱাৰ বাবেই এই সিদ্ধান্ত চৰকাৰৰ৷
অৱশ্যে বিদ্যালয় পুনৰ আৰম্ভ হোৱাৰ ক্ষেত্ৰত লোৱা নাই কোনো সিদ্ধান্ত। দিল্লী চৰকাৰ আৰু ৰাজ্যখনৰ ৰাজ্যপাল অনিল বৈজালৰ মাজত হোৱা এক বৈঠকত এই সিদ্ধান্ত গ্ৰহণ কৰা হয়৷ ৰাজ্যখনত দোকানবোৰ প্ৰতিদিনে খুলিবলৈ অনুমতি দিয়াৰ লগতে বিয়াত অতিথিৰ সংখ্যা ৫০ ৰ পৰা ২০০ লৈ বৃদ্ধি কৰা হৈছে। নৈশ সান্ধ্য আইন নিশা ১০ বজাৰ পৰা পুৱা ৫বজালৈ বাহাল থাকিব বুলি জানিব পৰা গৈছে।
উল্লেখ্য যে দিল্লীৰ স্বাস্থ্যমন্ত্ৰী সত্যেন্দ্ৰ জাইনে কৈছে যে চহৰখনৰ ক'ভিড পৰিস্থিতি নিয়ন্ত্ৰণত আছে আৰু ইতিবাচকতাৰ হাৰ ১০ শতাংশৰ তলত আছে। আজিৰ দিনটোত ৫,০০০ ক'ভিড পজিটিভ ধৰা পৰিছে দিল্লীত৷
Continue Reading
