ডিজিটেল ডেস্ক: শুকুৰবাৰে বিয়লি দিল্লীৰ আলিপুৰ অঞ্চলত সংঘটিত হয় এক শোকাৱহ দুৰ্ঘটনা। অঞ্চলটোত নতুনকৈ নিৰ্মাণ কৰা এটা গুদামৰ দেৱাল খহি পৰাৰ ফলত মৃত্যুমুখত পৰিছে পাঁচজনকৈ লোক। আনহাতে এই আকস্মিক দুৰ্ঘটনাত ন জন লোক আহত হৈছে। দুৰ্ঘটনাত আঘাতপ্ৰাপ্ত লোকসকলক তাৎক্ষণিকভাৱে চিকিৎসালয়লৈ প্ৰেৰণ কৰা হয়। অৱশ্যে ইয়াৰে দুজনৰ স্বাস্থ্যৰ অৱস্থা গুৰুতৰ বুলি জানিব পৰা গৈছে।
দিল্লী আৰক্ষীৰ এজন শীৰ্ষ বিষয়াই জানিবলৈ দিয়া মতে এই দুৰ্ঘটনাৰ বিষয়ে গবৰ লাভ কৰাভ কৰাৰ পিছতে উদ্ধাৰ অভিযানৰ বাবে চাৰিখন অগ্নি নিৰ্বাপক গাড়ী দুৰ্ঘটনাস্থলীলৈ তাৎক্ষণিকভাৱে প্ৰেৰণ কৰা হয়। অগ্নি নিৰ্বাপক গাড়ীকেইখন ঘটনাস্থলীত উপস্থিত হোৱাৰ পাছতে কোনো পলম নকৰাকৈ উদ্ধাৰ অভিযান আৰম্ভ কৰে।
আৰক্ষী বিষয়া গৰাকীৰ ভাষ্য মতে দুৰ্ঘটনাস্থলীত বৰ্তমান পৰ্যন্ত উদ্ধাৰ অভিযান চলি আছে। খহি পৰা দেৱালৰ ধ্বংসস্তূপত আৰু কিছু লোক আৱদ্ধ হৈ আছে বুলি আশংকা কৰা হৈছে।
ইফালে ঘটনাৰ পাছতে দিল্লীৰ মুখ্যমন্ত্ৰী অৰবিন্দ কেজৰিৱালে দুখ প্ৰকাশ কৰিছে। তেওঁ লগতে দেৱাল খহি পৰাৰ পিছত সংঘটিত হোৱা এই শোকাৱহ পৰিস্থিতিৰ উদ্ধাৰ তথা সাহায্য প্ৰদানৰ কাম তদাৰক কৰি আছে বুলি জানিবলৈ দিয়ে।
"আলিপুৰত এটা অতি শোকাৱহ ঘটনা সংঘটিত হৈছে। জিলা প্ৰশাসন বৰ্তমান ঘটনাস্থলীত উদ্ধাৰ কাৰ্যত জড়িত হৈ আছে। মই উদ্ধাৰ প্ৰক্ৰিয়াৰ কাম তদাৰক কৰি আছো। ঘটনাত নিহত হোৱা ব্যক্তিসকলৰ আত্মাৰ সদগতিৰ বাবে প্ৰাৰ্থনা জনাইছো।"- এক টুইট যোগে কেজৰিৱালে কয়।
প্ৰধানমন্ত্ৰী নৰেন্দ্ৰ মোদীয়েও ঘটনাটোত শোক প্ৰকাশ কৰে। এক টুইটযোগে তেওঁ এই শোকাৱহ দুৰ্ঘটনাত নিহত সকলক সান্তনা দিয়ে। লগতে প্ৰধানমন্ত্ৰী মোদীয়ে দুৰ্ঘটনাত আঘাতপ্ৰাপ্ত সকলৰ দ্ৰুত আৰোগ্য কামনা কৰে।
Continue Reading
