ডিজিটেল ডেস্ক: ৰাজস্থানৰ উদয়পুৰৰ লোমহৰ্ষক হত্যাকাণ্ডই জোকাৰিছে দেশ৷ নূপুৰ শৰ্মাৰ সমৰ্থনত ফেচবুকত পোষ্ট দিয়া বাবেই এগৰাকী দৰ্জীক শিৰশ্চেদ কৰা ঘটনাত এতিয়া দেশজুৰি সৃষ্টি হৈছে তীব্ৰ চাঞ্চল্যৰ৷ এই ঘটনাক কেন্দ্ৰ কৰি ৰাজ্যখনত বিৰাজ কৰিছে চেপা উত্তেজনা৷
কালি সংঘটিত এই ঘটনাৰ পাছতে অভিযুক্তৰ বিৰুদ্ধে ইউএপিএৰ অধীনত ৰুজু হৈছে গোচৰ৷ এগৰাকী দৰ্জীৰ হত্যাৰ পাছতে উদয়পুৰত বৰ্ধিত নিৰাপত্তাৰ মাজতে ৰাজস্থানৰ মুখ্যমন্ত্ৰী অশোক গেহলটে আজি কয় যে কঠোৰ বেআইনী কাৰ্যকলাপ প্ৰতিৰোধী আইন (ইউএপিএ)ৰ অধীনত এটা গোচৰ ৰুজু কৰা হৈছে৷
আৰক্ষী বিষয়াসকলে কৈছিল, প্ৰাথমিক অনুসন্ধানত প্ৰকাশ পাইছিল যে ঘটনাটো প্ৰাথমিকভাৱে সন্ত্ৰাস বিয়পোৱাৰ লক্ষ্যৰে কৰা হৈছিল। লগতে খবৰ পোৱা গৈছে যে অভিযুক্ত দুজনৰ সৈতে আন দেশত যোগাযোগ কৰা হৈছে৷ অশোক গেহলটে কয়, এই ঘটনাৰ গোচৰটো ইউএপিএৰ অধীনত পঞ্জীয়ন কৰা হৈছে সেয়েহে এতিয়া এন আই এৰ দ্বাৰা অধিক তদন্ত কৰা হ’ব, য’ত ৰাজস্থান এটিএছে সম্পূৰ্ণ সহযোগিতা আগবঢ়াব।
ৰাজস্থানৰ মুখ্যমন্ত্ৰীয়ে ৰাজ্যিক আৰক্ষী আৰু প্ৰশাসনক আইন-শৃংখলা নিশ্চিত কৰিবলৈ আৰু অপ্ৰীতিকৰ পৰিস্থিতিৰ প্ৰচেষ্টাৰ বিৰুদ্ধে কঠোৰ ব্যৱস্থা ল’বলৈ আহ্বান জনাইছিল। তেওঁ পৰিস্থিতিৰ পৰিপ্ৰেক্ষিতত শান্তি বজাই ৰাখিবলৈ ৰাইজক আহ্বান জনায়।
গেহলটে পূৰ্বে কৈছিল যে হত্যাকাৰীসকলৰ ভাৰত আৰু বিদেশৰ মৌলবাদী উপাদানৰ সৈতে সম্পৰ্কৰ তদন্ত কৰা হ'ব আৰু সেই অনুসৰি ঘৃণামূলক অপৰাধৰ তদন্তৰ বাবে এটা বিশেষ অনুসন্ধান দল (এছআইটি) গঠন কৰা হৈছে। তেওঁ কৈছিল যে এছআইটিয়ে ইয়াৰ কাম আৰম্ভ কৰিছে।
উদয়পুৰৰ ধন মাণ্ডি অঞ্চলত দোকান থকা ৪৭ বছৰীয়া দৰ্জী কানহাইয়ালাল তেলীক প্ৰফেট মহম্মদৰ বিষয়ে কৰা অপমানজনক মন্তব্যৰ বাবে ভাৰতীয় জনতা পাৰ্টিৰ নিলম্বিত মুখপাত্ৰ নূপুৰ শৰ্মাক সমৰ্থন কৰি এটা বাৰ্তা প্ৰেৰণ কৰাৰ পাছত দিনৰ পোহৰতে নিৰ্মমভাৱে হত্যা কৰা হৈছিল৷ ঘৃণামূলক অপৰাধটোৱে ৰাজ্যখনত প্ৰতিবাদমুখৰ পৰিৱেশৰ সৃষ্টি কৰিছিল আৰু ৰাজস্থানত ইণ্টাৰনেট সেৱা স্থগিত হৈ পৰিছিল৷
