ডিজিটেল ডেস্ক: কেন্দ্ৰীয় চৰকাৰে প্ৰৱৰ্তন কৰা ‘অগ্নিপথ’ আঁচনিৰ বিৰুদ্ধে দেশৰ বিভিন্ন প্ৰান্তত প্ৰতিবাদ অব্যাহত আছে৷ অগ্নিপথৰ জুই বিয়পি পৰিছে দক্ষিণ ভাৰতলৈও৷ তেলেংগানাৰ চেকেন্দ্ৰাবাদতো সংঘটিত হৈছে হিংসাত্মক পৰিস্থিতি৷ তেলেংগানাৰ চেকেন্দ্ৰাবাদ ৰে’ল ষ্টেচনত শুকুৰবাৰে সংঘটিত হিংসাত্মক ঘটনাৰ সন্দৰ্ভত এজন প্ৰাক্তন সেনাকৰ্মীক গ্ৰেপ্তাৰ কৰা হৈছে৷
তেলেংগানাৰ আৰক্ষী বিষয়াসকলে কয় যে আভুলা চুব্বা ৰাও হৈছে চেকেন্দ্ৰাবাদ হিংসাৰ আঁৰৰ মূল সূত্ৰধাৰ য’ত প্ৰতিবাদকাৰীসকলে কেইবাখনো ৰে’লত জুই লগাই ছিল৷ আনহাতে জনতাক ছত্ৰভংগ দিয়াবলৈ আৰক্ষীয়ে গুলীচালনা কৰাত এজন লোক নিহত হৈছিল।
খবৰ অনুসৰি ৰাওৱে জনতাক একত্ৰিত কৰিবলৈ ৱাটছএপ গ্ৰুপ খুলিছিল আৰু চেকেন্দ্ৰাবাদত অগ্নিসংযোগ আৰু ভাংচুৰত গুৰুত্বপূৰ্ণ ভূমিকা পালন কৰিছিল।ৰাও অন্ধ্ৰ প্ৰদেশৰ প্ৰকাশম জিলাৰ বাসিন্দা আৰু যোৱা কেইবছৰমানধৰি হায়দৰাবাদৰ নৰচাৰাওপেট আৰু কমেও সাতখন ঠাইত শাখা থকা সেনা প্ৰাৰ্থীসকলৰ বাবে এটা প্ৰশিক্ষণ একাডেমী চলাই আছে।
তেওঁক আৰক্ষীয়ে শনিবাৰে সোধা-পোছৰ বাবে আটক কৰিছিল। শুকুৰবাৰে হাজাৰ হাজাৰ প্ৰতিবাদকাৰীয়ে ৰে’ল ষ্টেচনত কেইবাখনো যাত্ৰীবাহী ৰে’লত আক্ৰমণ কৰি দবা জ্বলাই দিয়া আৰু ৰাজহুৱা সম্পত্তি ধ্বংস কৰাৰ ফলত ৱাৰাংগলৰ ১৯ বছৰীয়া ৰাজেশ নিহত হোৱাৰ লগতে এক ডজনৰো অধিক লোক আহত হয়।
আৰক্ষীয়ে আদোনি, কুৰ্ণুল, গুন্টুৰ, নেল্লোৰ, আমাদালাভালাচা, বিশাখাপত্তনম আৰু য়ালামানছলিৰ হিংসাত্মক ঘটনাৰ সন্দৰ্ভত কেইবাজনো লোকক আটক কৰিছে।
Continue Reading
