ডুমডুমাত ছুইফ্ট বাহনত সন্দেহযুক্ত হেৰ’ইনসহ তিনিজনক আটক

ডিজিটেল ডেস্ক: তিনিচুকীয়া জিলাৰ মাকুম সমজিলাৰ অতিৰিক্ত আৰক্ষী অধীক্ষক অৰূপজ্যোতি টেৰন আৰু ডুমডুমা সমজিলাৰ আৰক্ষী অধীক্ষক দিগন্ত দত্তৰ নেতৃত্বত ডুমডুমা আৰক্ষী থানাৰ সহযোগত চামডাং বাইপাছত অভিযান চলাই ছুইফ্ট বাহনৰ পৰা ৩৫০.২৭ গ্ৰাম হেৰ’ইনসহ ৩জন লোকক আটক কৰে৷ 

অভিযানকালত তালাপৰ পৰা AS 04 M 3660 নম্বৰৰ এখন ছুইফ্ট বাহনেৰে আহি আছিল৷ আৰক্ষীয়ে বাহনখনত অভিযান চলাই ৩৫০.২৭ গ্ৰাম হেৰ’ইন সহ এগৰাকী মহিলা আৰু দুজন লোকক আটক কৰে ৷ আৰক্ষীয়ে ডিব্ৰুগড় জিলাৰ মৰাণ গছপুৰীয়াৰ প্ৰদীপ কোঁৱৰ (৪৭), মৰাণৰ গোবিন্দ দত্ত (৪৫) আৰু পূৰ্ণলতা বৰুৱাক আটক কৰে৷ 

আৰক্ষীয়ে বাহনখনত তালাচী চলাই আঠটা চাবোনৰ বাকচত কৌশলেৰে লুকুৱাই অনা ৩৫০.২৭ গ্ৰাম নিষিদ্ধ হেৰ’ইন উদ্ধাৰ কৰে। আৰক্ষীৰ প্ৰাথমিক হিচাপ অনুসৰি উদ্ধাৰ হোৱা হেৰ’ইনৰ আনুমানিক বজাৰ মূল্য প্ৰায় ৭০ লাখ টকা। ছুইফ্ট বাহনখনৰ সৈতে ধৃত তিনিটাক ডুমডুমা থানালৈ নি আৰক্ষীয়ে জেৰা অব্যাহত ৰাখিছে ৷