ডিজিটেল ডেস্কঃ নয়ডাত সংঘটিত হৈছে এক ভয়াৱহ ঘটনা। দূষিত পানী খাই অসুস্থ হৈ পৰিছে ২০০তকৈও অধিক লোক। দূষিত পানী খোৱাৰ ফলত ইজনৰ পিছত সিজনকৈ বহু লোক অসুস্থ হ’বলৈ ধৰিছে।
গ্ৰেটাৰ নয়ডাৰ ইকো ভিলেজ-২ ছ’চাইটিত সৃষ্টি হৈছে এই চিন্তনীয় পৰিৱেশৰ।
জানিব পৰা মতে, গোটেই এপাৰ্টমেণ্টটোৰ প্ৰতিটো পৰিয়ালতে কোনোবা নহয় কোনোবা এজন বেমাৰত আক্ৰান্ত হৈছে। কেইবাজনো লোকক চিকিৎসালয়ত ভৰ্তি কৰা হৈছে। তীব্ৰ পেটৰ বিষ আৰু বমি হৈছে বাসিন্দাসকলৰ৷
চিকিৎসকৰ মতে, দূষিত পানী খোৱাৰ ফলত সমগ্ৰ এপাৰ্টমেন্টটোত এই অৱস্থাৰ সৃষ্টি হৈছে। ইয়াৰে কেইবাজনক চিকিৎসালয়ত ভৰ্তি কৰোৱা হৈছে, চাৰিটা শিশুৰ অৱস্থা সংকটজনক বুলি জানিব পৰা গৈছে।
বাসিন্দা সকলে জনোৱা মতে, দুদিন পূৰ্বে এপাৰ্টমেণ্টটোৰ পানীৰ টেংকি পৰিষ্কাৰ কৰা হৈছিল। পৰিষ্কাৰ কৰাৰ বাবে পানীৰ টেংকিত এক প্ৰকাৰৰ ৰাসায়নিক পদাৰ্থ ব্যৱহাৰ কৰা হৈছিল।
এই ৰাসায়নিক পদাৰ্থ সম্পূৰ্ণৰূপে পৰিষ্কাৰ নকৰাকৈয়ে টেংকিটো পানীৰে ভৰাই দিয়া হৈছিল। সেই পানী খাই অসুস্থ হৈ পৰিছে বাসিন্দাসকল।
এপাৰ্টমেন্টৰ পানীৰ টেংকি আৰু পানীৰ সকলো নল বন্ধ কৰি দিয়া হৈছে৷ প্ৰশাসনে বিষয়টো গভীৰভাৱে তদন্ত কৰিবলৈ নিৰ্দেশ দিছে৷
Continue Reading
