ডিজিটেল ডেস্কঃ বিহাৰৰ সাৰণ জিলাৰ ইছুৱাপুৰস্থিত এখন বজাৰত সংঘটিত হৈছে এক ভয়ংকৰ দুৰ্ঘটনা। মহাবীৰ মেলাৰ আখৰাৰ সময়ত সেই ঠাইত থকা এখন ঘৰৰ বেলকনি ভাঙি পৰে। বেলকনিত বহি মানুহে সংগীতানুষ্ঠান উপভোগ কৰি আছিল। এই দুৰ্ঘটনাত প্ৰায় এশজন লোক আহত হয়৷ আটাইকেইজন ইছুৱাপুৰ কমিউনিটি হেল্থ চেণ্টাৰ হাস্পতালত চিকিৎসাধীন হৈ আছে, আনহাতে বহু লোকক ব্যক্তিগত চিকিৎসালয়ত ভৰ্তি কৰা হৈছে। আহত একাংশৰ অৱস্থা অতি গুৰুতৰ । পতাকা মেলা সন্দৰ্ভত প্ৰশাসনিক ব্যৱস্থা কটকটীয়া হোৱাৰ বাবে ড্ৰ’ন কেমেৰাৰ জৰিয়তে মেলাখন নিৰীক্ষণ কৰা হৈছিল।
সেই ঠাইত উপস্থিত থকা লোকৰ চিঞৰ-বাখৰত মানুহে ভয় খাই পলাবলৈ ধৰিলে। এই ভিৰত কিছু লোকে কোনোমতে নিজৰ প্ৰাণ ৰক্ষা কৰে ৷ বিপুল জনসমাগমৰ বাবে কিছুলোকে হেঁচা ঠেলাত মাটিত বাগৰি পৰে । এই দুৰ্ঘটনাত ১০০ৰো অধিক লোক আহত হয়। ইমানেই হুলস্থুলীয়া পৰিৱেশৰ সৃষ্টি হয় যে একাংশ লোকে ৰাইজক বাধা দিবলৈ চেষ্টা কৰে । আহত আটাইকেইজনকে ওচৰৰ চিকিৎসালয়ত ভৰ্তি কৰোৱা হৈছে। আহত একাংশৰ অৱস্থা গুৰুতৰ বুলি জানিব পৰা গৈছে।
স্থানীয় প্ৰশাসনিক আৰু আৰক্ষী বিষয়াৰ উপৰিও জিলাখনৰ পৰা ২০ গৰাকী দণ্ডাধীশ, ৫০ গৰাকী মহিলা আৰক্ষী বাহিনী আৰু ২০০ পুৰুষ বাহিনী উপস্থিত হৈ মেলাৰ প্ৰশাসনিক ব্যৱস্থা তদাৰক কৰে। মেলাত আগতীয়াকৈ এম্বুলেন্স আৰু প্ৰাথমিক স্বাস্থ্য শিবিৰৰো ব্যৱস্থা কৰা হৈছিল। সেয়েহে দুৰ্ঘটনা সংঘটিত হোৱাৰ লগে লগে কাম আৰম্ভ কৰা হয়, যাৰ বাবে বহু লোকৰ প্ৰাণ ৰক্ষা কৰিব পৰা যায়। উল্লেখ্য যে প্ৰতি বছৰৰ দৰে এইবাৰো মহাবীৰ মেলাত পতাকা শোভাযাত্ৰা উলিয়াই । ইয়াত বহুতো সংগীত শিল্পীয়ে অংশগ্ৰহণ কৰে।
নিশাৰ আন্ধাৰত সংঘটিত এই দুৰ্ঘটনাটোত কোনো লোক সন্ধানহীন হোৱাৰ খবৰ পোৱা নাই ।
Continue Reading
