ডিজিটেল ডেস্ক : চুবুৰীয়া পাকিস্তানৰ ৰাজনৈতিক সংকটৰ পাছত এইবাৰ শ্ৰীলংকাতো সৃষ্টি হৈছে সংকটৰ। পাকিস্তানৰ প্ৰধানমন্ত্ৰী ইমৰাণ খান ইতিমধ্যেই অপসাৰিত হৈছে গাদীৰ পৰা। দেশখনত কোনো এগৰাকী প্ৰধানমন্ত্ৰীয়ে কাৰ্যকাল সম্পূৰ্ণ কৰিব নোৱৰাৰ পৰম্পৰা অব্যাহত ৰাখি ইমাৰাণ খানেও আধাতে সামৰিছে কাৰ্যকাল। পিছে এইবাৰ আন এখন চুবুৰীয়া দেশ শ্ৰীলংকাতো একেই সংকটে গা কৰি উঠিছে।
অৰ্থনৈতিক সংকটত জৰ্জৰিত শ্ৰীলংকাত এতিয়া ৰাজনৈতিক সংকটৰো সৃষ্টি হৈছে। দেশখনৰ শাসকীয় মিত্ৰজোঁটৰ পৰা ৪১গৰাকীকৈ সাংসদ ওলাই অহাৰ পাছত এতিয়া শাসকীয় মিত্ৰজোঁটে সংখ্যাগৰিষ্ঠতা হেৰুৱাবলগীয়া হৈছে। শাসকীয় পক্ষৰ মিত্ৰদলে দেশখনৰ ৰাষ্ট্ৰপতি গোটাবায়া ৰাজাপাক্সেৰ পদত্যাগ দাবী কৰি এই পদক্ষেপ গ্ৰহণ কৰিছিল। দেশখনৰ স্বাধীনতাৰ পাছৰ আটাইতকৈ বৃহৎ অৰ্থনৈতিক সংকটৰ বাবে যি অস্থিৰ পৰিস্থিতিৰ সৃষ্টি হৈছে তাৰ পৰিপ্ৰেক্ষিততে এতিয়া ৰাজনৈতিক সংকট অৱধাৰিত হৈ পৰিছে দেশখনত।
আনকি দায়িত্বভাৰ গ্ৰহণৰ এদিনৰ পাছতে দেশখনৰ বিত্তমন্ত্ৰী আলী ছাবৰেও পদত্যাগ কৰিছে। দেশখনত খাদ্যৰ পৰা আৰম্ভ কৰি ঔষধলৈকে বিভিন্ন অত্যাৱশ্যকীয় সামগ্ৰীৰ অভাৱ যিমানে গাঢ় হৈ পৰিছে সিমানেই অস্থিৰতা বৃদ্ধি পাইছে আৰু ব্যাপক প্ৰতিবাদে গা কৰি উঠিছে। সৰ্বস্তৰৰ জনতাৰ এই প্ৰতিবাদৰ আগত থিৰেৰে থকাটো প্ৰত্যাহ্বানপূৰ্ণ হৈ পৰিছে চৰকাৰৰ বাবে।
উল্লেখ্য যে, দেশখনৰ ৰাষ্ট্ৰপতি ৰাজাপাক্সেই সোমবাৰে চাৰিগৰাকী নতুন মন্ত্ৰীক কেবিনেটত অন্তৰ্ভুক্ত কৰিছিল। তেওঁলোকৰ মাজৰে এগৰাকী আছিল বিত্তমন্ত্ৰী ছাৰবে। কিন্তু প্ৰৱল অৰ্থনৈতিক সংকটৰ পৰিপ্ৰেক্ষিতত তেওঁ এই দায়িত্বত ন্যস্ত হৈ থকাৰ সাহ কৰিব নোৱাৰিলে।
উল্লেখ্য যে, দেশখনৰ বিৰোধী দলসমূহে কালি ৰাষ্ট্ৰপতিয়ে আহ্বান জনোৱা সৰ্বদলীয় বৈঠকৰ আমন্ত্ৰণ প্ৰত্যাখ্যান কৰিথিল আৰু ইয়াক অৰ্থহীন আখ্যা দিছিল। তেওঁলোকে ৰাষ্ট্ৰপতিৰ পদত্যাগৰ দাবী সজোৰে উত্থাপন কৰে।
ইফালে, দেশখনৰ সংসদৰ উপাধ্যক্ষ ৰণজিথ ছিয়ামবালাপিটিয়াইও ইতিমধ্যে পদত্যাগ কৰিছে। ইফালে, আন্তঃৰাষ্ট্ৰীয় মুদ্ৰানিধি চমুকৈ আইএমএফ-এ মঙলবাৰে প্ৰকাশ কৰে যে, তেওঁলোকে দেশখনৰ অৰ্থনৈতিক আৰু ৰাজনৈতিক সংকটক গভীৰভাৱে নিৰীক্ষণ কৰি আছে। চৰকাৰৰ বিৰুদ্ধে ব্যাপক গণজাগৰণৰ বিষয়টোৱে ইতিমধ্যেই আন্তঃৰাষ্ট্ৰীয় মহলৰ দৃষ্টি আকৰ্ষণ কৰিছে আৰু ইয়াৰ পৰ্শ্ব প্ৰতিক্ৰিয়াক লৈ আন্তঃৰাষ্ট্ৰীয় মহল উদ্বিগ্ন হৈ পৰিছে।
ভাৰতে চুবুৰীয়া দেশখনক সংক্টৰ সৈতে মোকাবিলা কৰাত সহায় কৰিবলৈ তৎপৰ হৈ পৰা দেখিবলৈ পোৱা গৈছে। ভাৰতৰ পৰা ভালেমান সাহায্য সামগ্ৰী ইতিমধ্যে প্ৰেৰণ কৰা হৈছে দেশখনলৈ। ভাৰতে দেশখনলৈ এক সুস্থিৰ অৱস্থা নহালৈকে এনে সাহায্য প্ৰেৰণ কৰি থাকিব বুলি প্ৰকাশ কৰিছে।
Continue Reading
