ৱেব ছিৰিজ চাই ১১ মহলাৰ পৰা জঁপিয়ালে কিশোৰে, তাৰপাছত !

ডিজিটেল ডেস্ক : ৱেব ছিৰিজৰ প্ৰতি আসক্তি হৈ এজন কিশোৰে সংঘটিত কৰিলে ভয়ংকৰ ঘটনা৷ 'প্লেটিনাম এণ্ড' নামৰ জনপ্ৰিয় জাপানী ৱেব-চিৰিজৰ প্ৰতি আসক্তি এজন ১২ বছৰীয়া কিশোৰে উত্তৰ কলকাতাৰ এটা এপাৰ্টমেণ্টৰ ১১ মহলাৰ পৰা জঁপিয়াই মৃত্যুমুখত পৰে বুলি সোমবাৰে আৰক্ষীয়ে প্ৰকাশ কৰিছে। এই শোকাৱহ ঘটনাটো শনিবাৰে সংঘটিত হৈছিল আৰু প্ৰাৰম্ভিক অনুসন্ধানৰ পাছত, আৰক্ষীয়ে জানিব পাৰে যে কিশোৰজন ৱেব-ছিৰিজ 'প্লেটিনাম এণ্ড'ত দেখুওৱাৰ দৰে এজনী 'এঞ্জেল'-এ তেওঁক ৰক্ষা কৰাৰ আশাৰে জঁপিয়াই দিছিল। জাপানীছ অনুষ্ঠান 'প্লেটিনাম এণ্ড' এটা কাল্পনিক কাহিনীৰ ওপৰত আধাৰিত৷ ইয়াত কিশোৰ-নায়কজনে এটা অট্টালিকাৰ চালৰ পৰা জঁপিয়াই পৰাৰ পাছতে এজন দেৱদূতে ৰক্ষা কৰিছিল যাৰ পাছত নায়কজনে যাদুকৰী শক্তি বিকশিত কৰিছিল, আৰক্ষীয়ে জানিবলৈ দিয়ে। লগতে কয়, 'প্ৰাথমিক অনুসন্ধানৰ পাছত নিশ্চিত যে কিশোৰজন এই ধাৰাবাহিকখনৰ প্ৰতি আসক্ত আছিল আৰু ইয়াৰ দ্বাৰা অনুপ্ৰাণিত হৈ এই মাৰাত্মক পদক্ষেপ লৈছিল৷' আৰক্ষীয়ে জনোৱা অনুসৰি, শনিবাৰে সৰস্বতী পূজাৰ দিনা পাৰ্ক চাৰ্কাছৰ ফুলবাগান অঞ্চলৰ কেনেল চাৰ্কুলাৰ ৰোডৰ এটা উচ্চ মানৰ হাউচিং কমপ্লেক্সত এই ঘটনা সংঘটিত হয়। পৰিয়ালৰ আন সদস্যসকলে পূজাত ব্যস্ত থকাৰ সময়ত বিৰাজ পাচিচিয়া নামৰ ১২ বছৰীয়া কিশোৰজনে ছাদলৈ গৈ জঁপিয়াই দিছিল আৰু পুলটোৰ কাষৰ কংক্ৰিটৰ মজিয়াত পৰিছিলগৈ৷ শব্দটো শুনি হাউচিং কমপ্লেক্সৰ লোকসকলে এখন প্ৰিমিয়াৰ স্কুলৰ পাৰ্কত তেজেৰে তুমুৰলি হৈ থকা অৱস্থাত প্ৰত্যক্ষ কৰে। ঘটনাৰ পাছতে তেওঁক ততাতৈয়াকৈ ওচৰৰে নাৰ্চিং হোমলৈ লৈ যোৱা হয় যদিও কিশোৰটিক মৃত ঘোষণা কৰে৷