ৱেব ছিৰিজত ইমান অশ্লীল ভাষা কিয়? 'কলেজ ৰোমাঞ্চ'ৰ পৰিচালকৰ বিৰুদ্ধে এজাহাৰ দাখিলৰ নিৰ্দেশ উচ্চ ন্যায়ালয়ৰ

 উচ্চ ন্যায়ালয়ে কৈছে "এই ভাষা যুৱ প্ৰজন্মৰ ভাষা হ'ব নোৱাৰে।’’ ভাষাৰ ক্ষেত্ৰত শালীনতা বজাই নৰখাৰ বাবেই  দিল্লী উচ্চ ন্যায়ালয়ৰ ৰোষত পৰিছে টিভিএফৰ ৱেব চিৰিজ 'কলেজ ৰোমাঞ্চ'ৰ নিৰ্মাতা।ৱেব শৃংখলাটোৰ নিৰ্মাতা আৰু অভিনেতাসকলে অত্যাধিক অশালীন ভাষা ব্যৱহাৰ কৰাৰ বাবে দিল্লী উচ্চ ন্যায়ালয়ে তেওঁলোকক চোকা  সমালোচনা কৰিছে ৷টিভিএফ বা 'দ্য ভাইৰেল ফিভাৰ' হৈছে অ'টিটি প্লেটফৰ্মৰ অন্যতম প্ৰসিদ্ধ  কোম্পানী। টিভিএফ-প্ৰযোজিত ৱেব শৃংখলা 'কলেজ ৰোমাঞ্চ' ২০১৮  চনত মুক্তি দিয়া হৈছিল। 

ৱেব শৃংখলাটোৰ অভিনেতা-অভিনেত্ৰীসকলে  অত্যাধিক অশালীন ভাষা ব্যৱহাৰ কৰাৰ বাবে দিল্লী উচ্চ ন্যায়ালয়ৰ সমালোচনাৰ সন্মুখীন হৈছে। উচ্চ ন্যায়ালয়ৰ একক বিচাৰপীঠে মন্তব্য কৰিছে যে ৱেব শৃংখলাটোৰ ভাষা অতি অশালীন আৰু লেতেৰা, আৰু ই যুৱ প্ৰজন্মৰ ওপৰত নেতিবাচক প্ৰভাৱ পেলাব পাৰে।অতিৰিক্ত মুখ্য মেট্ৰ'পলিটান মেজিষ্ট্ৰেট আৰু অতিৰিক্ত সত্ৰ ন্যায়াধীশে দিল্লী আৰক্ষীক ২০১৮ ৰ ৱেব চিৰিজ 'কলেজ ৰোমাঞ্চ'ত অশ্লীল ভাষা ব্যৱহাৰ কৰাৰ অভিযোগত এখন এজাহাৰ পঞ্জীয়ন কৰিবলৈ নিৰ্দেশ দিয়ে। ৱেব চিৰিজৰ পৰিচালক চিমাৰপ্ৰীত সিং আৰু অভিনেতা অপুৰবা অৰোৰাৰ বিৰুদ্ধে ভাৰতীয় দণ্ডবিধিৰ ২৯২ আৰু ২৯৪ ধাৰা আৰু তথ্য প্ৰযুক্তি আইনৰ ৬৭ আৰু ৬৭এ ধাৰাৰ অধীনত এখন এজাহাৰ দাখিলৰ  নিৰ্দেশ দিয়া হৈছে।

দিল্লীৰ আদালতৰ ন্যায়াধীশ স্বৰ্ণ কান্ত শৰ্মাই আদেশটো বাহাল  ৰাখিছে।বিচাৰকগৰাকীয়ে কয়  "এই ৱেব শৃংখলাত ব্যৱহৃত ভাষা কেতিয়াও দেশৰ যুৱ প্ৰজন্মৰ ভাষা হ'ব নোৱাৰে। এই ভাষাত ব্যৱহাৰ  কৰাটো ভাল নহয়’’। বিচাৰকগৰাকীয়ে লগতে  কয় যে ৱেব শৃংখলা 'কলেজ ৰোমাঞ্চ'ৰ ভাষা ইমানেই অশালীন যে আনৰ উপস্থিতিত তেওঁ আনকি তেওঁৰ কোঠাতো কাণত হেডফোন লৈ শুনিব লগা হৈছিল। ৱেব শৃংখলাত ব্যৱহৃত ভাষা সভ্য সমাজত ব্যৱহাৰৰ বাবে উপযুক্ত নহয়৷ যদি এনে ভাষা ব্যৱহাৰ হৈ থাকে, তেন্তে এদিন ই দেশৰ যুৱ প্ৰজন্মৰ সংস্কৃতি হৈ পৰিব। ''চিমাৰপ্ৰীত সিঙৰ ৱেব চিৰিজ 'কলেজ ৰোমাঞ্চ' ২০১৮ চনত মুক্তি পাইছিল। 'দ্য ভাইৰেল ফিভাৰ'ৰ দ্বাৰা প্ৰযোজিত, ৱেব শৃংখলাটো প্ৰথমতে ইউটিউবত আৰু পিছত টিভিএফপ্লেত মুকলি কৰা হৈছিল।