আমদানি শুল্ক হ্রাস; দাম কমিব খোৱা তেলৰ

ডিজিটেল ডেস্ক: পূজাৰ বতৰত খোৱা তেলৰ দাম নিয়ন্ত্ৰণ কৰিবৰ বাবে কেন্দ্রীয় চৰকাৰে পাম তেল, ছয়াবীন তেল আৰু বেলিফুল তেলকে ধৰি খোৱা তেল আৰু ৰিফাইন তেলৰ আমদানি শুল্ক হ্রাস কৰে। ছয়াবীন তেল আৰু পাম তেলৰ বেছিক কাষ্টম ডিউটি ১০ শতাংশৰ পৰা ৫ শতাংশলৈ হ্রাস কৰা হৈছে। সেইদৰে বেলিফুলৰ তেলৰ আমদানি শুল্ক ১০ শতাংশৰ পৰা শূন্য শতাংশলৈ হ্রাস কৰা হৈছে। 

ৰিফাইন খোৱা তেলৰ ভিতৰত, ৰিফাইন ছয়াবীন তেল আৰু ৰিফাইন পাম তেলৰ আমদানি শুল্ক ৩২.৫ শতাংশৰ পৰা ২৭.৫ শতাংশলৈ হ্রাস কৰা হৈছে। ৰিফাইন বেলিফুলৰ তেলৰ শুল্ক ৩২.৫ শতাংশৰ পৰা ২২.৫ শতাংশলৈ হ্রাস কৰা হৈছে। 

২৪ ছেপ্টেম্বৰৰ মাজনিশাৰ পৰাই এই নতুন নিৰিখ বলৱৎ হৈছে। আমদানি শুল্ক হ্রাস পোৱা বাবে উৎসৱৰ বতৰত খোৱা তেলৰ দামো হ্রাস পোৱাৰ সম্ভাৱনা আছে। দৈনিক ভাস্কৰৰ এক প্রতিবেদন মতে, আমদানি শুল্ক হ্রাস পোৱাৰ বাবে ছয়াবীন তেলৰ দাম (প্রতি লিটাৰত) বৰ্তমানৰ ১৩৫-১৮০ টকাৰ পৰা ১২৯-১৭৪ টকালৈ, বেলিফুলৰ তেল ১৮০-২৪০ টকাৰ পৰা ১৭৪-২৩৪ টকালৈ, পাম তেল ১২৫-১৬৫ টকাৰ পৰা ১১৯-১৫৯ টকালৈ হ্রাস পোৱাৰ সম্ভাৱনা আছে।

উৎস: দৈনিক জনমভূমি