ডিজিটেল ডেস্কঃ পৱিত্ৰ ঈদৰ দিনাই সংঘটিত হৈছে এক আশ্চৰ্যকৰ ঘটনা৷ইছলামিক অনুগামীসকলৰ পবিত্ৰ গ্ৰন্থ কোৰান জ্বলোৱাৰ ঘটনাই ইণ্টাৰনেটত বৰ্তমান আতংকৰ সৃষ্টি কৰিছে। ইউৰোপৰ এখন দেশ ছুইডেনৰ মছজিদৰ বাহিৰত কোৰান জ্বলাই দিয়া হয়।
আশ্চৰ্যজনক কথাটো হ’ল ছুইডেন চৰকাৰে কোৰান জ্বলোৱাৰ ঘটনাক লৈ প্ৰতিবাদকাৰীৰ বিৰুদ্ধে কোনো ব্যৱস্থা লোৱা নাই, বৰঞ্চ চৰকাৰে মত প্ৰকাশৰ স্বাধীনতা বুলিহে অভিহিত কৰিছে । ঘটনাৰ পাছৰে পৰা ইছলাম ধৰ্মৰ অনুগামীসকলে ছচিয়েল মিডিয়াত প্ৰতিবাদ সাব্যস্ত কৰা পৰিলক্ষিত হৈছে।
প্ৰথমে তুৰস্কৰ বৈদেশিক মন্ত্ৰালয়ে এক বিবৃতি প্ৰকাশ কৰে। তুৰস্কৰ বৈদেশিক মন্ত্ৰালয়ে ছুইডেনত কোৰআন জ্বলোৱাক এক জঘন্য অপৰাধ বুলি অভিহিত কৰিছে। তুৰস্কৰ বৈদেশিক মন্ত্ৰী হাকান ফিডানে টুইট কৰি কয়- "কোনোৱেই মত প্ৰকাশৰ স্বাধীনতাৰ নামত ইছলাম বিৰোধী বিক্ষোভ কৰিব নোৱাৰে।"
উল্লেখযোগ্য যে এই ঘটনা সংঘটিত হৈছে ছুইডেনৰ ষ্টকহ’ম চেণ্ট্ৰেল মছজিদৰ সন্মুখত, য’ত বুধবাৰে ৩৭ বছৰীয়া এজন ব্যক্তিয়ে কোৰআন ফালি জুই লগাইছিল। শ শ লোকৰ উপস্থিতিত এই অপৰাধ সংঘটিত হৈছিল, যাৰ বহুতেই কোৰআন জ্বলোৱাৰ সমৰ্থন কৰিছিল। চিএনএনৰ মতে, মত প্ৰকাশৰ স্বাধীনতাৰ অধীনত এই অনুমতি ছুইডেন চৰকাৰে এদিনীয়া বিক্ষোভৰ বাবে দিছিল।
Continue Reading
