ডিজিটেল ডেস্ক: পয়গম্বৰ হজৰত মহম্মদৰ বিৰুদ্ধে টেলিভিছনৰ টকশ্ব'ত বিতৰ্কিত মন্তব্য কৰি দেশ তথা বিদেশতো ক্ষোভৰ সৃষ্টি কৰা বিজেপিৰ অপসাৰিত নেত্ৰী নুপূৰ শৰ্মাৰ মন্তব্যৰ প্ৰতিক্ৰিয়া এতিয়া শাম কটা নাই। এনে সময়তে হজৰত মহম্মদৰ বিৰুদ্ধে বিতৰ্কিত মন্তব্য কৰি এইবাৰ ৰঙাঘৰৰ আলহী হ'বলগীয়া হ'ল মহাৰাষ্ট্ৰৰ এজন যুৱক।
হজৰত মহম্মদকলৈ কৰা মন্তব্যৰ বাবে আন্তঃৰাষ্ট্ৰীয় ক্ষেত্ৰত ভাৰত চাপত থকাৰ সময়তে এইবাৰ ছ'চিয়েল মিডিয়াত পয়গম্বৰৰ বিষয়ে এজন যুৱকে কৰা আপত্তিজনক মন্তব্যই মহাৰাষ্ট্ৰত বিতৰ্কৰ সৃষ্টি কৰিছে। আৰক্ষীয়ে এই ঘটনা পোহৰলৈ অহাৰ পিছতে এজন যুৱকক গ্ৰেপ্তাৰ কৰিছে।
আৰক্ষীসূত্ৰই জনোৱা অনুসৰি, অভিযুক্তজন হৈছে ২৮ বছৰীয়া নিকেশ ৰাজু পাষ্টে। ভিৱান্দিৰ সঙ্গমপাৰা পাইকাৰী বজাৰত সৰু-সুৰা ব্যৱসায় কৰা যুৱকজনে অলপতে হোৱাটছএপ গ্ৰুপত পয়গম্বৰ হজৰত মহম্মদৰ বিষয়ে এক আপত্তিজনক মন্তব্য কৰিছিল।
এজন লোকে তেওঁৰ বিৰুদ্ধে নিজাম্পাৰা আৰক্ষী থানাত অভিযোগ দাখিল কৰিছিল। তেওঁ এজাহাৰত এইবুলি উল্লেখ কৰিছিল যে নিকেশ পয়গম্বৰৰ বিষয়ে কৰা মন্তব্যই দুটা সম্প্ৰদায়ৰ মাজত অস্থিৰতাৰ সৃষ্টি কৰিব পাৰে। তেওঁৰ মন্তব্যই এটা সম্প্ৰদায়ৰ ধৰ্মীয় অনুভূতিত আঘাত কৰা বুলিও এজাহাৰত উল্লেখ কৰা হৈছিল। এয়াৰ পিছতে নিজাম্পাৰা আৰক্ষী থানাই অভিযুক্ত যুৱক নিকেশক গ্ৰেপ্তাৰ কৰে। নিকেশ ৰাজু পেষ্টক আৰক্ষীয়ে কোনো সম্প্ৰদায়ৰ (ভাৰতীয় দণ্ডবিধিৰ ধাৰা ২৯৫-এ) ধৰ্মীয় আৱেগত আঘাত কৰা দুটা সম্প্ৰদায়ৰ মাজত শত্ৰুতাৰ ষড়যন্ত্ৰ কৰাৰ (১৫৩-এ) অভিযোগৰ লগতে মানহানিৰ (৪৯৯)ৰ গোচৰ ৰুজু কৰিছে।
উল্লেখ্য বিতৰ্কিত বিজেপি নেত্ৰী নুপূৰ শৰ্মাক হজৰত মহম্মদৰ বিৰুদ্ধে কৰা মন্তব্যৰ বাবে ৫ জুলাইত বিজেপিৰ পৰা বহিষ্কাৰ কৰা হৈছিল। শেহতীয়াকৈ, বিহাৰৰ এজন ইউটিউবাৰে বিজেপি নেত্ৰীগৰাকীক ধৰ্ষণ আৰু হত্যা কৰাৰ ভাবুকি দিয়াৰ অভিযোগ উঠিছে। ইউটিউবাৰ জনে ভগৱান ৰামৰ বিষয়েও অতি অশ্লীল মন্তব্যও কৰিছিল।
স্বাভাৱিকতে, এনে মন্তব্যক লৈ এক নতুন বিতৰ্কৰ সৃষ্টি হৈছে। নেটিজেনসকলৰ এটা অংশই তেওঁক গ্ৰেপ্তাৰ কৰাৰ দাবী জনাই আহিছে।
ইফালে, বহিষ্কৃত বিজেপি নেত্ৰী নুপূৰ শৰ্মাক বংগৰ নাৰিকলডাঙা আৰক্ষী থানাৰ পিছত আমহাৰ্ষ্ট ষ্ট্ৰীট আৰক্ষী থানাই মাতি পঠিয়াইছিল। তেওঁ ২৫ জুনত আৰক্ষী চকীত হাজিৰ হোৱাৰ কথা আছিল। নুপূৰ শৰ্মাই আৰু কিছু সময় বিচাৰি আৰক্ষীলৈ ই-মেইল কৰিছে।
Continue Reading
