ডিজিটেল ডেস্ক: এইবাৰ সন্ত্ৰাসবাদীৰ আক্ৰমণ চলিছে ইৰানত৷ দেশখনৰ আৰক্ষী থানাত ওৰেনিশা সন্ত্ৰাস চলালে সশস্ত্ৰ সন্ত্ৰাসবাদীয়ে। চুন্নী মুছলমান সন্ত্ৰাসবাদী গোটে নিৰ্মমভাৱে গুলীয়াই হত্যা কৰিলে ১১জনকৈ আৰক্ষী বিষয়াক। দেশখনৰ ছিষ্টান-বেলুচিস্তান প্ৰদেশত কালি নিশা সংঘটিত হ’ল এই লোমহৰ্ষক ঘটনা।
ৰাস্ক নগৰত থকা আৰক্ষীৰ মুখ্য কাৰ্যালয়ক লক্ষ্য কৰি সন্ত্ৰাসবাদীয়ে আক্ৰমণ চলায়। ইতিমধ্যে এই ঘটনাৰ দায়িত্ব স্বীকাৰ কৰিছে জইছ আল-আদল সন্ত্ৰাসবাদী গোটে। এই সন্ত্ৰাসবাদী গোটটো গঠন কৰা হৈছিল ২০১২ চনত। ইৰাণ চৰকাৰে এই গোটটোক পূৰ্বতে সন্ত্ৰাসবাদী গোট ৰূপে ঘোষণা কৰিছে। কালি নিশাৰ এই ঘটনাত কেইবাজনো সন্ত্ৰাসবাদী নিহত হোৱাৰ তথ্য লাভ কৰিছে আৰক্ষীয়ে। সেই সময়ত মুখ্য কাৰ্যালয়ত উপস্থিত আছিল আৰক্ষীৰ কমাণ্ডাৰ। আৰক্ষীয়ে সন্ত্ৰাসবাদীক গুলীৰে প্ৰত্যুত্তৰ দিয়ে।
সম্প্ৰতি পৰিস্থিতি নিয়ন্ত্ৰণ কৰা হৈছে যদিও অনুসন্ধান অব্যাহত ৰখা হৈছে।
এই অঞ্চলটোত প্ৰায়ে চিয়া আৰু চুন্নী মুছলমানৰ মাজত সংঘাতৰ সূত্ৰপাত হয়। চিয়া অধ্যুষিত এই অঞ্চলত সময়ে সময়ে চুন্নী মুছলমান সন্ত্ৰাসবাদীয়ে আক্ৰমণ সংঘটিত কৰি আহিছে।
Continue Reading
