এখন পোষ্টাৰৰ বাবেই শ্ৰমিকে মৰিয়াই মৰিয়াই হত্যা কৰিলে মেনেজাৰক

ডিজিটেল ডেস্ক: মৃত্যুৱে কাৰ বাবে কেতিয়া ৰৈ থাকে কোনেও নাজানে৷ হয়তো সেয়া হ’ব পাৰে কাৰোবাৰ বাবে স্বাভাৱিক মৃত্যু, দুৰ্ঘটনা অথবা অন্য কাৰণত৷ কিন্তু বৰ্তমান সময়ত কোনোৱে কাৰোবাক হত্যা কৰি মৃত্যুৰ পথলৈ থেলি দিয়া এক স্বাভৱিক ঘটনাতে পৰিণত হৈছে৷ কিমান নৃশংস হ’লে মৰিয়াই মৰিয়াই এজন মানুহৰ মৃত্যুৰ কিৰলীত ৰং চাব পাৰে৷ পাকিস্তানৰ ছিয়ালকোটৰ এটা কাৰখানাত কৰ্মৰত শ্ৰীলংকাৰ এজন মেনেজাৰক অতি বৰ্বৰতাৰে এদল শ্ৰমিকে মৰিয়াই মৰিয়াই হত্যা কৰে৷ ইমানতে ক্ষান্ত নাথাকি মৃত্যুদূতৰূপী শ্ৰমিককেইটাই মৃত শৰীৰটোৰ ওপৰতো অত্যাচাৰ চলাই জ্বলাই দিয়ে৷

শুকুৰবাৰে শ্ৰীলংকাৰ মেনেজাৰজনক এখন পোষ্টাৰক কেন্দ্ৰ কৰিয়েই কাৰখানাটোত কৰ্মৰত এদল শ্ৰমিকে আক্ৰমণৰ লক্ষ্য কৰি লৈছিল৷ ছিয়ালকোটৰ আৰক্ষীয়ে জানিবলৈ দিয়া অনুসৰি এই মুক্তহত্যাকাণ্ডটোত শতাধিক লোক জড়িত আছিল বুলি প্ৰকাশ পাইছে৷ আৰক্ষীয়ে ইতিমধ্যে প্ৰায় ৫০জনকৈ ব্যক্তিক আটক কৰাৰ লগতে এই ঘটনা সন্দৰ্ভত তদন্ত অব্যাহত ৰাখিছে৷ আটকাধিক শ্ৰমিকসকলক উচিত শাস্তি প্ৰদানৰো আশ্বাস প্ৰদান কৰিছে আৰক্ষী প্ৰশাসনে৷

ইফালে এই ঘটনা সন্দৰ্ভত টেলিভিছনত প্ৰকাশ পোৱা এটা ভিডিঅ’ত ছিয়ালকোটৰ ৰাজপথত শতাধিক শ্ৰমিকে মেনেজাৰজনক আক্ৰমণ কৰাৰ দৃশ্য পৰিলক্ষিত হয়৷ এই ঘটনাৰ পাছতে দেশখনত এনে বৰ্বৰতাৰ ঘটনাক তীব্ৰ ভাষাৰে গৰিহনা দিছে৷ বহুতে এই নৃশংসতাক ইছলামিক শিক্ষাৰ প্ৰতিফলন বুলিও মতপ্ৰকাশ কৰিছে।