অ'মিক্ৰন আহিল! পাঁচ বছৰৰ শিশুৰ জীৱনক লৈ বাঢ়িছে শংকা

ডিজিটেল ডেস্ক : এটাৰ পাছত এটা শংকাই খেদিছে বিশ্ববাসীক৷ কৰ’নাৰ লীলাই তিতা-কেঁহা লগালেও সাৱধান নহ’লে হেৰুৱাব লগা হ’ব পাৰে জীৱন৷ কৰ’নাৰ প্ৰভাৱ সম্পূৰ্ণৰূপে মাৰ নৌযাওঁতেই অ’মিক্ৰনৰ কৱলত পৰিছে বহু লোক৷ ক’ভিড প্ৰতিষেধক আৱিষ্কাৰ হোৱাৰ পাছৰে পৰা জনসাধাৰণে কিছু সকাহ লাভ কৰিলেও কিন্তু সংক্ৰমণ নিয়ন্ত্ৰণলৈ অহা নাই৷ বিশ্বজুৰি ক’ভিড প্ৰতিষেধক গ্ৰহণৰ ক্ষেত্ৰত কঠোৰ নীতি-নিৰ্দেশনা জাৰি কৰিছে৷ বাধ্যতামূলক কৰিছে সকলোকে প্ৰতিষেধক গ্ৰহণ কৰাৰ৷

কোনো দেশত ক’ভিডৰ চতুৰ্থটো ঢৌৰ কৱলত পৰিছে যদিও কিছু দেশত তৃতীয়টো ঢৌৱে প্ৰভাৱ পৰিছে৷ ইয়াৰ বিপৰীতে বিশেষ চিন্তনীয় হৈ পৰিছে শিশুসকলক লৈ৷ পাঁচ বছৰৰ তলৰ শিশুসকলৰ দেহত ক’ভিডৰ দ্ৰুতসংক্ৰমণে যথেষ্ট চিন্তাত পেলাইছে অভিভাৱকসকলক৷ কোনোধৰণৰ প্ৰতিষেধকৰ ব্যৱস্থা নোহোৱাৰ বাবেহে অধিক চিন্তাৰ বিষয় হৈ পৰিছে শিশুসকলক লৈ৷

দক্ষিণ আফ্ৰিকাৰ স্বাস্থ্য বিভাগে দিয়া এক তথ্য অনুসৰি ক’ভিডৰ নতুন ভেৰিয়েণ্ট অ’মিক্ৰনৰ প্ৰভাৱৰ প্ৰতি আশংকা কৰি ৫ বছৰৰ তলৰ শিশুৰ বাবে চিকিৎসালয়, আইচিইউ বৃদ্ধিৰ সিদ্ধান্ত লৈছে যদিও প্ৰতিষেধকৰ ব্যৱস্থা নকৰিলে এই শিশুসকলৰ জীৱনৰ প্ৰতি এক ভাবুকীৰ সৃষ্টি হ’ব পাৰে বুলি দেশখনৰ স্বাস্থ্য বিভাগে জানিবলৈ দিয়ে৷ সংক্ৰমণৰ প্ৰতি লক্ষ্য ৰাখি শিশুসকলৰ অভিভাৱকক পৰ্যাপ্ত পৰিমাণে সতৰ্কতা অৱলম্বন কৰিবলৈ আহ্বান জনাইছে৷