একনাথ সিন্দেঃ অট'ৰিক্সা চালকৰ পৰা মহাৰাষ্ট্ৰৰ মুখ্যমন্ত্ৰী হোৱালৈকে এক বৰ্ণিল যাত্ৰা

উল্লেখ্য যে ২১ জুনৰ পৰা ২৯ জুনলৈ নিজৰ অনুগত শিৱ সেনাৰ ৩৯ বিধায়কৰ সৈতে গুৱাহাটীত বাহৰ পাতি আছিল একনাথ সিন্দেই। গুৱহাটীৰ হোটেল ৰেডিছন ব্লুৰ পৰাই একনাথ সিন্দেই মহাৰাষ্ট্ৰৰ ৰাজনীতি নিয়ন্ত্ৰণ কৰি আছিল। মুম্বাইলৈ উভতি যোৱাৰ আগতে নীলাচলত মা কামাখ্যাৰ আশিস লৈও গৈছিল একনাথ সিন্দেই। বৰ্তমান সময়ত সমগ্ৰ দেশবাসীয়ে জানিব বিচাৰে কোন একনাথ সিন্দে। যাৰ শাসনৰ বাঘজৰীত এতিয়া পৰিচালিত হব একনাথ সিন্দে। একনাথ সিন্দে হৈছে ঠাকৰে পৰিয়ালৰ বাহিৰৰ আটাইতকৈ শক্তিশালী শিৱসেনাৰ নেতা। তেওঁৰ বাল ঠাকৰে যুগৰ পৰাই শিৱসেনাত প্ৰভাৱশালী ভূমিকা পালন কৰিছিল। তেওঁ নিজেই উদ্ধৱ ঠাকৰেৰ অতি ঘনিষ্ঠ আছিল। ৫৮ বছৰীয়া সিন্দে মহাবিকাশ আঘাদীৰ চৰকাৰতো নগৰ উন্নয়ন মন্ত্ৰী আছিল। একনাথ সিন্দেৰ জন্ম হৈছিল মহাৰাষ্ট্ৰৰ সাতাৰা জিলাত ১৯৬৪ চনৰ ৯ ফেব্ৰুৱাৰীত। তেওঁ একাদশ শ্ৰেণীলৈকে অধ্যয়ন কৰিছিল। 

একনাথ সিন্দেই পাছত মহাৰাষ্ট্ৰৰ থানেলৈ আহি তাতে তেওঁ অটো ৰিক্সা চলাবলৈ আৰম্ভ কৰে। এসময়ত অটো চলোৱা একনাথ সিন্দেই কেতিয়াও ভবা নাছিল যে তেওঁ এদিন মহাৰাষ্ট্ৰ শাসন কৰিব। আশীৰ দশকত অটো ৰিক্সা চলাই শিৱসেনাত যোগদান কৰিছিল একনাথে। সেই সময়ত তেওঁ শিৱসেনাৰ নেতা আনন্দ দিঘেক লগ পায়। মাত্ৰ ১৮ বছৰ বয়সতে তেওঁৰ ৰাজনৈতিক কেৰিয়াৰ আৰম্ভ হৈছিল। তেওঁ দলৰ এজন উমৈহতীয়া কৰ্মী হিচাপে শিৱসেনাৰ সৈতে জড়িত আছিল আৰু তাৰে পৰাই তেওঁ মুখ্যমন্ত্ৰীলৈ যাত্ৰা সম্পূৰ্ণ কৰিছে। ঠাকৰে পৰিয়ালৰ প্ৰতি সিন্দেৰ আনুগত্য এনেকুৱা আছিল যে দলটোৰ বাবে তেওঁ আনকি জে'ললৈও গৈছিল। থানেৰ কোপৰি পঞ্চপাখাদী আসনৰ পৰা ৪ বাৰকৈ তেওঁ বিধায়ক নিৰ্বাচিত হৈছে। আৰম্ভণিৰে পৰা তেওঁ এজন নিষ্ঠাবান আৰু শক্তিশালী শিৱ সেনাৰ নেতা হিচাপে পৰিচয় গঢ়ি তুলিছিল। 

একনাথ সিন্দে ইমানেই শক্তিশালী নেতা যে ২০১৯ চনত শিৱসেনাৰ পৰা মুখ্যমন্ত্ৰী পদৰ বাবেও তেওঁৰ নাম উচ্চাৰিত হৈছিল। উদ্ধৱ ঠাকৰেই মুখ্যমন্ত্ৰী হিচাপে কাৰ্যভাৰ গ্ৰহণ কৰাক লৈ জল্পনা-কল্পনা চলিছিল আৰু এনে সময়ত একনাথ সিন্দেৰ নাম চৰ্চালৈ আহিছিল। কিন্তু শেষ মুহূৰ্তত সিদ্ধান্ত লোৱা হৈছিল যে উদ্ধৱ ঠাকৰে মুখ্যমন্ত্ৰী হ’ব আৰু একনাথ সিন্দে মুখ্যমন্ত্ৰী হোৱাৰ পৰা বঞ্চিত হৈছিল। তদুপৰি শাৰদ পাৱাৰ আৰু ছোনিয়া গান্ধীয়ে উদ্ধৱ থাকৰেৰ নামত একমত হৈছিল বুলি জনা যায়। ঠাকৰে পৰিয়ালেও নিজেই ক্ষমতাৰ শীৰ্ষ পদত নিজকে চাব বিচাৰিছিল আৰু এনে পৰিস্থিতিত একনাথে মুখ্যমন্ত্ৰীৰ চকী বাদ দিছিল। একনাথ সিন্দে মহাৰাষ্ট্ৰৰ থানে অঞ্চলৰ আটাইতকৈ শক্তিশালী ৰাজনৈতিক ব্যক্তিত্ব। থানেত প্ৰাৰ্থী বাছনি কৰাৰ পৰা আৰম্ভ কৰি প্ৰচাৰ আৰু কৌশল প্ৰস্তুত কৰালৈকে তেওঁ সকলোতে খোজ কাঢ়ি গৈছিল। অঞ্চলটোত সক্ৰিয় হৈ থকা নেতা হিচাপে স্বীকৃতি লাভ কৰিছে একনাথে। সকলোৰে মনত তেওঁৰ প্ৰতিচ্ছবিও এজন আধিপত্যশীল নেতা হিচাপে গঢ়ি উঠিছে। 

এনে নহয় যে একনাথ সিন্দেৰ অসন্তুষ্টি হঠাতে চৰ্চালৈ আহিছিল, আনকি শিৱসেনা আৰু বিজেপিৰ মিত্ৰজোঁটৰ চৰকাৰৰ সময়তো তেওঁৰ দলৰ মাজত হাইকমাণ্ডৰ লগত মতানৈক্য আছিল আৰু সিন্দে হয়তো বিজেপিত যোগদান কৰিব পাৰে বুলি খবৰ ওলাইছিল। কিন্তু সেই সময়ত এই সকলোবোৰ কেৱল উৰাবাতৰি বুলি প্ৰমাণিত হ’ল। উল্লেখ্য যে এসময়ত দুখৰ ধুমুহাই বৰ বেয়াকৈ কোবাই গৈছিল সিন্দেক। সিন্দে তেতিয়া কাউন্সিলাৰ আছিল। এই সময়ছোৱাত তেওঁৰ পৰিয়ালটো সতৰালৈ গৈছিল। ইয়াত এক দুৰ্ঘটনাত তেওঁ ১১ বছৰীয়া পুত্ৰ দীপেশ আৰু ৭ বছৰীয়া কন্যা শুভাদাক চিৰদিনলৈ হেৰুৱাইছিল। নাওঁ চলাই থাকোঁতে এটা দুৰ্ঘটনা সংঘটিত হোৱাৰ লগে লগে সিন্দেৰ দুয়োটা সন্তান চকুৰ সন্মুখতে উটি যায়। সেই সময়ত সিন্দেৰ প্ৰথম পুত্ৰ শ্ৰীকান্তৰ বয়স আছিল মাত্ৰ ১৩ বছৰ। 

শ্ৰীকান্ত বৰ্তমান কল্যাণ লোকসভা আসনৰ পৰা শিৱসেনাৰ সাংসদ। এই ঘটনাৰ পিছত সিন্দে যথেষ্ট ভাঙি পৰিছিল। আনকি তেওঁ ৰাজনীতিৰ পৰাও আঁতৰি আহিছিল। এই মানসিক দুখৰ পৰা তেওঁক আনন্দ দিঘেই উভতাই আনি পুনৰ ৰাজহুৱা জীৱনলৈ ঘূৰাই আনিছিল। বৰ্তমান সকলোৰে দৃষ্টি নিৱদ্ধ আছে মহাৰাষ্ট্ৰৰ নতুন মুখ্যমন্ত্ৰী একনাথ সিন্দেৰ ওপৰত। মহাৰাষ্ট্ৰক তেওঁ কেনেদৰে শাসন কৰি বিকাশৰ পথত আগুৱাই লৈ যাব সেয়া নিশ্চয়কৈ হ'ব লক্ষ্যণীয়।