ডিজিটেল ডেস্ক : ছেলফীৰ লোভে প্ৰাণ কাঢ়িলে এটি কিশোৰৰ। ৰখাই থোৱা এখন ৰে’লৰ ওপৰত উঠি ছেলফী লোৱাৰ চেষ্টা কৰিছিল এটি ১৬ বছৰীয়া কিশোৰে। তাৰ পাছত তেওঁ এক ভয়ংকৰ পৰিণতিৰ সন্মুখীন হ’বলগীয়া হ’ল। ছেলফী এতিয়া যুৱ প্ৰজন্মৰ জীৱন যাত্ৰাৰ এক এৰাব নোৱৰা আহিলাত পৰিণত হৈছে। বিভিন্ন ঠাইত, বিভিন্ন ভংগিত ছেলফী লোৱাটো হৈ পৰিছে সকলোৰে নিচা। কিন্তু তাকে কৰিবলৈ যাওঁতে কেনে ভয়ংকৰ পৰিণতি হ’ব পাৰে তাৰ এক নিদাৰুণ নিদৰ্শন দেখিবলৈ পোৱা যায়।
বিপদজনকভাৱে ছেলফী লোৱাৰ চেষ্টা কৰি প্ৰাণ হেৰুৱালে এটি ১৬ বছৰীয়া কিশোৰে। ষ্টেচনত ৰখাই থোৱা এখন ৰেলৰ ইঞ্জিনৰ ওপৰত উঠি ছেলফী লোৱাৰ চেষ্টা কৰিছিল কিশোৰজনে। সেই সময়তে তেওঁ উচ্চ ক্ষমতাসম্পন্ন বিদ্যুৎ পৰিবাহী তাঁৰৰ সংস্পৰ্শলৈ আহে আৰু বিদ্যুৎস্পৃষ্ট হৈ মৃত্যুমুখত পৰে। ঘটনাটো মধ্য প্ৰদেশৰ চাতাপুৰ ৰেল ষ্টেচনত সংঘটিত হোৱা বুলি সদৰি কৰিছে ৰেল বিভাগৰ এগৰাকী বিষয়াই। কালি এই শোকাৱহ ঘটনা সংঘটিত হয়।
চাতাপুৰ ৰে'ল ষ্টেচনৰ ষ্টেচন মাষ্টাৰ শুভংক পেটেলে ঘটনাটোৰ বিষয়ে প্ৰকাশ কৰে। মৃত কিশোৰজন ছুহাইল মনচুৰী বুলি চিনাক্ত কৰা হৈছে। কিশোৰজনৰ বন্ধু আশ্ৰাফে সদৰি কৰা মতে ছুহাইলে পুৱা ৰেল ষ্টেচনলৈ গৈছিল আৰু মোবাইল ফোন হাতত লৈ ছেলফি লোৱাৰ বাবে এটা ৰখাই থোৱা ৰেল ইঞ্জিনত উঠিছিল। সেই সময়তে এই শোকাৱহ দুৰ্ঘটনাটো সংঘটিত হয়।
Continue Reading
