ডিজিটেল ডেস্কঃ তিনিখন বিতৰ্কিত ভাৰতীয় সংহিতা তৎক্ষণাত কাৰ্যকৰী নকৰিব। বংগৰ মুখ্যমন্ত্ৰী মমতা বেনাৰ্জীয়ে প্ৰধানমন্ত্ৰী নৰেন্দ্ৰ মোদীলৈ এখন পত্ৰ লিখি এই দাবী জনাইছে। মুখ্যমন্ত্রীৰ মতে নৈতিকতা মানি চলি কেন্দ্রই এই আইনকেইখন এতিয়া কার্যকৰী কৰা উচিত নহয়৷ যোৱা বছৰৰ শেষৰ ফালে কেন্দ্রই পুৰণি অপৰাধ আইনৰ ঠাইত ভাৰতীয় ন্যায় সংহিতা, ভাৰতীয় নাগৰিক সুৰক্ষা সংহিতা আৰু ভাৰতীয় প্রমাণ বিধেয়ক গৃহীত কৰিছিল৷ এই তিনিখন আইনক একেলগে ন্যায় সংহিতা বুলি কোৱা হয়। এই নতুন আইনকেইখন কাৰ্যকৰী কৰাত বিৰোধীয়ে বহু আপত্তি উত্থাপন কৰি আহিছে। কিন্তু কেন্দ্ৰই সেই আপত্তিলৈ কোনো গুৰুত্ব দিয়া নাই। । ১ জুলাইৰ পৰা সেই তিনিখন আইন সমগ্ৰ দেশতে কাৰ্যকৰী হ’ব পাৰে।
আৰম্ভণিৰে পৰাই তৃণমূল নেত্ৰী মমতাই এই আইনকেইখন কাৰ্যকৰী কৰাত আপত্তি দৰ্শাই আহিছে। মমতাৰ মতে দণ্ডবিধি আইন গৃহীত হোৱাৰ সময়ত অধিকাংশ সাংসদ নিলম্বিত হৈ আছিল।সেয়ে এই আইনকেইখনৰ বিষয়ে সঠিকভাৱে আলোচনা হোৱা নাই। এই আইন কাৰ্যকৰী হ’লে আৰক্ষীয়ে অধিক ক্ষমতা লাভ কৰিব । তদুপৰি এই আইনকেইখনত কেইবাটাও সুৰুঙা থকা বুলিও মমতাই কয়। আইনৰ বিভিন্ন ধাৰাত অসামঞ্জস্যতা থাকিব পাৰে বুলিও মমতাই কৈ আহিছে।শেহতীয়াকৈ প্ৰধানমন্ত্ৰী মোদীলৈ লিখা চিঠিখনত মমতাই সেই আপত্তি পুনৰবাৰ উল্লেখ কৰে৷ মমতাই কয়, “সেই তিনিখন আইন একনায়কত্ববাদী মানসিকতাৰ পৰা গৃহীত হৈছিল। গণতন্ত্ৰৰ অন্ধকাৰ দিনত এই আইনকেইখন গৃহীত কৰা হৈছিল। এই আইনকেইখন পুনৰ বিবেচনা কৰি চোৱাৰ সময় আহি পৰিছে বুলি মই ভাবো।” উল্লেখ্য কেন্দ্ৰই অনা তিনিখন নতুন অপৰাধী আইনৰ ক্ষেত্ৰত ইংৰাজীৰ পৰিৱৰ্তে হিন্দী নাম ব্যৱহাৰ কৰাত কোনো আপত্তি নাই বুলি পূৰ্বেই গৃহ পৰিক্ৰমা সম্পৰ্কীয় সংসদীয় সমিতিয়ে ভাৰতীয় ন্যায় বিধি, ভাৰতীয় নাগৰিক সুৰক্ষা বিধি আৰু ভাৰতীয় প্ৰমাণ আইনৰ নাম হিন্দীতে উল্লেখ কৰাৰ বিষয়ত অনুমোদন জনাইছিল।
বিজেপি সাংসদ ব্ৰিজলালৰ নেতৃত্বত গঠিত সংসদীয় সমিতিয়ে কৈছিল যে গৃহ মন্ত্ৰালয়ে প্ৰস্তুত কৰা তিনিখন নতুন আইনৰ নাম হিন্দীত দিয়া হ'ব । কিন্তু সেই নাম ইংৰাজী লিপিত লিখা হ'ব। গতিকে সেই নামবোৰ অসাংবিধানিক বুলি গণ্য কৰিব পৰা নাযাব।
কেন্দ্ৰই ভাৰতীয় দণ্ডবিধিৰ (আইপিচি) ধাৰা ১২৪(ক) সংশোধন কৰাৰ সিদ্ধান্ত লৈছে। লোকসভাত তিনিখন আইন - ভাৰতীয় দণ্ডবিধি, ফৌজদাৰী প্ৰক্ৰিয়া বিধি (চিআৰপিচি) আৰু ভাৰতীয় প্ৰমাণ আইন সলনি কৰাৰ প্ৰস্তাৱ উত্থাপন কৰা হৈছে। ১৮৬০ চনৰ ভাৰতীয় দণ্ডবিধি ভাৰতীয় ন্যায় সংহিতা হিচাবে পৰিচিত হ’ব।
চিআৰপিচিৰ নাম সলনি হৈ হ’ব নাগৰিক সুৰক্ষা সংহিতা, এভিডেন্স এক্টৰ নাম সলনি হৈ হ’ব ভাৰতীয় সাক্ষ্য আইন।বিৰোধীয়ে কেন্দ্ৰই এই আইনসমূহৰ নাম হিন্দীত দিয়াৰ বিষয়ত আপত্তি কৰি আহিছে। কংগ্ৰেছ আৰু ডিএমকেয়ে প্ৰশ্ন কৰিছিল যে সংবিধানৰ ৩৪৮ নং অনুচ্ছেদত কোৱা হৈছে যে ইংৰাজীক আদালতৰ কাৰ্য্যক্ৰম বা আইনত ভাষা হিচাপে ব্যৱহাৰ কৰিব লাগে। তেন্তে এই নতুন আইনবোৰত হিন্দী নাম কিয় ব্যৱহাৰ কৰা হৈছে?
বিৰোধীয়ে গৃহ পৰিক্ৰমা সংসদীয় সমিতিতো এই প্ৰশ্ন উত্থাপন কৰিছিল। অৱশ্যে, শেষত, সংসদীয় সমিতিয়ে তিনিওখন আইনৰ নাম হিন্দীতে কৰাৰ সিদ্ধান্ত লৈছিল।
Continue Reading
