নেপালত জুইৰ মাজত উজলি উঠিছে একমাত্র বলেন শ্বাহ

ডিজিটেল ডেস্কঃ  নেপালত হোৱা প্ৰবল তথা হিংসাত্মক প্ৰতিবাদৰ সময়ত যেতিয়া মন্ত্ৰী-ৰাজনীতিকসকল আক্ৰমণৰ লক্ষ্য হৈছে তথা তেওঁলোকৰ কোনো কথাই প্রতিবাদকাৰীয়ে শুনিবলৈ বিচৰা নাই, সেই সময়তে এটা নাম উচ্চাৰণ হৈছে- বলেন শ্বাহ। তেওঁ বর্তমান কাঠমাণ্ডু মেট্রপলিটান মহানগৰৰ মেয়ৰ। মঙলবাৰে শ্বাহে প্ৰতিবাদকাৰীলৈ আহ্বানো জনাইছে। এটা ফে'চবুক প'ষ্টত তেওঁ কৈছে যে প্রধানমন্ত্রীয়ে যেতিয়া পদত্যাগ কৰিলে, সেয়ে প্রতিবাদকাৰীয়ে অধিক প্রাণ আৰু সম্পত্তি হানিৰ কামৰ পৰা বিৰত থাকিব লাগে।

তেওঁ ফে'চবুকত কয়, 'অনুগ্ৰহ কৰি শান্ত হওক। ৰাষ্ট্ৰীয় সম্পদৰ ক্ষতি আমাৰ সকলোৰে ক্ষতি। এতিয়া সকলোৱে সংযম প্রদর্শন কৰা দৰকাৰ। এতিয়াৰ পৰা আপোনালোকৰ প্ৰজন্মই দেশৰ নেতৃত্ব ল'ব লাগিব।” 'বয়সৰ সীমা'ৰ (জেন-জেদ) বাবে অংশগ্ৰহণ কৰিব নোৱাৰিলেও সোমবাৰে শ্বাহে প্ৰতিবাদকাৰীৰ প্ৰতি সমর্থন জনাইছিল। নিজৰ মহানগৰতে প্ৰভাৱ সীমিত থকা আন মেয়ৰৰ দৰে নহয় বলেন শ্বাহ, 'টাইম' আলোচনীত '২০২৩ চনৰ শীৰ্ষ ১০০ ব্যক্তিত্ব'ৰ তালিকাত তথা 'নিউয়র্ক টাইমছ'ৰ দৰে সংবাদপত্ৰৰ বাতৰিত স্থান লাভ কৰি তেওঁ ৰাষ্ট্ৰীয় আৰু আন্তঃৰাষ্ট্ৰীয়ভাৱে দৃষ্টি আকৰ্ষণ কৰিছে।

এই ৩৫ বছৰীয়া ব্যক্তিজন হৈছে এসময়ৰ ৰেপাৰ (ৰেপ ছঙৰ শিল্পী)। তেওঁৰ এটা ৰেপ ছঙৰ কথা হৈছে এনেকুৱা- 'দেশক সুৰক্ষা দি থকা সকলো মূর্খ। সকলো নেতা চোৰ, দেশক লুটিছে আৰু খাইছে।' এইজন ৩৫ বছৰীয়া নেতাকে এতিয়া জেন-জেডৰ প্ৰতিবাদকাৰীয়ে দেশৰ নেতৃত্ব দিবলৈ আহ্বান জনাইছে। অন্য কথাত নেপালৰ পৰৱৰ্তী প্রধানমন্ত্রী পদৰ বাবে জেন-জেডৰ পচন্দ হৈছে বলেন শ্বাহ।

উৎসঃ দৈনিক জনমভূমি