ডিজিটেল ডেস্কঃ দিনত ভিক্ষা খুজে আৰু ৰাতি হোটেলত থাকে। এয়া এদল ভিক্ষাৰীৰ কাহিনী। মধ্য প্ৰদেশৰ ইন্দোৰ চহৰৰ কৰ্তৃপক্ষই মহানগৰীত ভিক্ষা খুজি থকা ১১টা শিশুসহ ২২ জনীয়া এটা দলক ৰাজস্থানৰ জন্মস্থানলৈ ঘূৰাই পঠিয়াইছে।
মহিলা আৰু শিশু উন্নয়ন বিভাগৰ এগৰাকী বিষয়াই জনোৱা মতে, মহানগৰীৰ এখন হোটেলত ভিক্ষাৰীৰ দল এটাই বাহৰ পাতিছিল। তাত ১১টা সন্তান আৰু ১১ সংখ্যক মহিলা আছিল। দিনটো চহৰৰ বিভিন্ন ঠাইত ভিক্ষা খুজি ৰাতি তেওঁলোক হোটেললৈ উভতি আহে।
বিষয়াগৰাকীয়ে এটা সংবাদ সংস্থাক জনোৱা মতে, ভিক্ষাৰীসকলক তেওঁলোকৰ গৃহ ৰাজ্যলৈ ঘূৰাই পঠোৱাৰ পূৰ্বে পৰামৰ্শ দিয়া হৈছিল। ইয়াৰ পিছত মহানগৰীৰ সকলো হোটেল, লজ আৰু অন্যান্য আশ্ৰয় শিবিৰৰ পৰিচালকসকলক সকীয়াই দিয়া হৈছে যে ভিক্ষা কৰা মানুহক থাকিবলৈ নিদিব, অন্যথা তেওঁলোকৰ বিৰুদ্ধে আইনী ব্যৱস্থা গ্ৰহণ কৰা হ’ব।
১০খন চহৰক ভিক্ষাৰী মুক্ত কৰাৰ পদক্ষেপ
কেন্দ্ৰীয় সামাজিক ন্যায় আৰু সবলীকৰণ মন্ত্ৰালয়ে দেশৰ ১০খন চহৰক ভিক্ষাৰীমুক্ত কৰাৰ বাবে এক পাইলট প্ৰজেক্ট আৰম্ভ কৰিছে। ইয়াৰে ইন্দোৰ অন্যতম আৰু স্থানীয় প্ৰশাসনে ইন্দোৰত ভিক্ষা খুজাত নিষেধাজ্ঞা আৰোপ কৰিছে। এই পৰ্যন্ত ইন্দোৰৰ পৰা ভিক্ষাত নিয়োজিত ১০০ জন লোকক পুনৰ সংস্থাপন কৰা হৈছে।
Continue Reading
