ডিজিটেল ডেস্কঃ মহাৰাষ্ট্ৰত শীঘ্ৰে হ’ব বিধানসভা নিৰ্বাচন। ৰাজ্যখনত নিৰ্বাচনী উত্তাপ তীব্ৰতৰ হৈ পৰিছে। সকলো দলে প্ৰতিদিনে ক’ৰবাত নহয় ক’ৰবাত জনসভা সম্বোধন কৰিছে।
ইয়াৰ মাজতে এজন বিধায়কৰ বক্তব্য পোহৰলৈ আহিছে, যিয়ে বহুত হুলস্থুলৰ সৃষ্টি কৰিছে। দৰাচলতে মঙলবাৰে ৱাৰুদ তহচিলত ৰাজহুৱা সভাত ভাষণ দি ৱাৰুদ-মৰ্শী বিধানসভাৰ নিৰ্দলীয় বিধায়ক তথা উপ-মুখ্যমন্ত্ৰী অজিত পাৱাৰৰ সমৰ্থক দেৱেন্দ্ৰ ভূয়াৰৰ এক বক্তব্যক লৈ বিতৰ্কৰ সূচনা হৈছে।
কি বক্তব্য দিলে বিধায়কগৰাকীয়ে?
ৰাজহুৱা সভাত ভাষণ দি বিধায়কগৰাকীয়ে কয়, “যদি ছোৱালী এজনী ধুনীয়া হয়, তেন্তে তেওঁ আপোনাৰ আৰু মোৰ দৰে মানুহক ভাল নাপায়, বৰঞ্চ চাকৰি থকা পুৰুষকহে বাছি লয়। ইয়াৰ পিছত তেওঁ আৰু ছোৱালীৰ পছন্দৰ কথা উল্লেখ কৰি কয় যে কম ধুনীয়া ছোৱালীবোৰে গেলামালৰ দোকান বা পাণৰ দোকান চলোৱা মানুহক বেছি পছন্দ কৰে। দেখিবলৈ অসুন্দৰ ছোৱালীয়ে কৃষকৰ ল'ৰাক বিয়া কৰাবলৈ পছন্দ কৰে। কেৱল কম ধুনীয়া ছোৱালীবোৰেহে কৃষকৰ পৰিয়ালৰ ল'ৰাক বিয়া কৰায়।" ইয়াৰ পিছতে সামান্য হতাশা প্ৰকাশ কৰি তেওঁ আৰু কয় যে এনে বিবাহৰ পৰা জন্ম হোৱা সন্তানবোৰো ধুনীয়া নহয়।
বিধায়কৰ বক্তব্যক লৈ হুলস্থুল
নিৰ্দলীয় বিধায়ক ভূয়াৰৰ এনে বক্তব্যৰ পিছত মহাৰাষ্ট্ৰৰ ৰাজনৈতিক উষ্ণতা অধিক হৈ পৰিছে। এই বক্তব্য সন্দৰ্ভত কংগ্ৰেছ নেত্ৰী তথা মহাৰাষ্ট্ৰৰ প্ৰাক্তন মহিলা আৰু শিশু উন্নয়ন মন্ত্ৰী যশোমতী ঠাকুৰে মহিলা সন্দৰ্ভত এনে বক্তব্যক তীব্ৰ গৰিহণা দিছে।
Continue Reading
