ডিজিটেল ডেস্কঃ মানৱতাৰ বধ্যভূমিত পৰিণত হৈছে গাজা। আনকি আক্ৰমণৰ পৰা চিকিৎসালয়ো সাৰি যোৱা নাই। আকাশমাৰ্গৰ পৰা চলোৱা আক্ৰমণত বিধ্বস্ত হৈ পৰিছে গাজাৰ এখন চিকিৎসালয়। বোমা নিক্ষেপ কৰাৰ ফলত চিকিৎসালয় খনত থকা ৫০০ ৰো অধিক লোকৰ মৃত্যু ঘটিছে।
মৃতসকলৰ বেছিভাগেই মহিলা আৰু শিশু বুলি জানিব পৰা গৈছে। এই আক্ৰমণৰ আঁৰত ইজৰাইলী সামৰিক বাহিনী জড়িত থকাৰ অভিযোগ কৰিছে হামাছে। অৱশ্যে তেল আভিভে পেলেষ্টাইনী উগ্ৰপন্থী গোটে এই কাৰ্য সংঘটিত কৰা বুলি দাবী কৰিছে। আমেৰিকাৰ ৰাষ্ট্ৰপতি জো বিডেনে বুধবাৰে তেল আভিভত উপস্থিত হোৱাৰ কথা আছে। তাৰ ঠিক আগতে গাজাত এনে ভয়ংকৰ আক্ৰমণৰ ঘটনা সংঘটিত হৈছে।
সংবাদ মাধ্যমৰ বাতৰি অনুসৰি ইজৰাইলী সৈন্যই গাজাৰ আল-আহলী আৰৱ চিকিৎসালয়ত আক্ৰমণ চলাইছে। যুদ্ধত আহতসকলক চিকিৎসালয়ত চিকিৎসাধীন কৰোৱা হৈছিল। গাজাৰ কৰ্তৃপক্ষই কৈছে যে আক্ৰমণত ৫০০ ৰো অধিক লোক নিহত হৈছে।
হামাছ-ইজৰাইল সংঘৰ্ষৰ আজিও শাম কটা নাই।এই যুদ্ধত এতিয়ালৈকে মৃত্যুৰ সংখ্যা ৪,০০০ অতিক্ৰম কৰিছে। এনে পৰিস্থিতিত চিকিৎসালয়ত ইমান সংখ্যক লোকৰ কৰুণ মৃত্যুৱে পুনৰ পৰিস্থিতিৰ অৱনতি ঘটাইছে। আমেৰিকা যুক্তৰাষ্ট্ৰৰ বিদেশ সচিব এণ্টনি ব্লিঙ্কেন বৰ্তমান তেল আভিভত আছে।
তেওঁ কৈছে যে আমেৰিকাৰ ৰাষ্ট্ৰপতি জো বিডেনে বুধবাৰে যুদ্ধবিধ্বস্ত ইজৰাইল ভ্ৰমণ কৰিব। তেওঁ যুদ্ধৰ পৰিস্থিতি নিজে আহি চাব। তেওঁ ইজৰাইলৰ প্ৰধানমন্ত্ৰী বেঞ্জামিন নেতান্যাহুক সাক্ষাৎ কৰি হামাছৰ আক্ৰমণৰ বিৰুদ্ধে ইজৰাইলৰ প্ৰতিৰক্ষাৰ দিশটো পৰ্যালোচনা কৰিব।
Continue Reading
