ডিজিটেল ডেস্কঃ নিজৰ ঘৰৰ সুৰক্ষাৰ বাবে এজন লোকে ঘৰত পুহিছিল এটা পিটবুল কুকুৰ। কুকুৰটোক ঘৰলৈ পুহিবলৈ আনোতে তেওঁ কেতিয়াও ভবা নাছিল যে সেই কুকুৰেই এদিন মাকৰ মৃত্যুৰ কাৰণ হৈ পৰিব। উত্তৰ প্ৰদেশৰ লক্ষ্ণৌত সংঘটিত হৈছে এক হৃদয় বিদাৰক ঘটনা। এই ঘটনা সংঘটিত হৈছে লক্ষ্ণৌৰ কাইজাৰবাগ আৰক্ষী থানা অঞ্চলত। এটা পোহনীয়া পিটবুল কুকুৰে এগৰাকী ৮০ বছৰীয়া মহিলাক আক্ৰমণ কৰাত মহিলাগৰাকীৰ যন্ত্ৰণাদায়ক মৃত্যু হৈছিল।
কাইজাৰবাগ আৰক্ষী থানাৰ আৰক্ষী বিষয়াই জনোৱা মতে, ৮০ বছৰীয়া অৱসৰপ্ৰাপ্ত শিক্ষয়িত্ৰীগৰাকীক এটা পোহনীয়া পিটবুল কুকুৰে আক্ৰমণ কৰে। কুকুৰটোৱে এনেদৰে কামুৰিছিল যে মহিলাগৰাকীৰ মাংসও শৰীৰৰ পৰা পৃথক হৈ পৰিছিল। সেই সময়ছোৱাত মহিলাগৰাকী ঘৰত অকলে আছিল। জিম ট্ৰেইনাৰ পুত্ৰ জিমলৈ গৈছিল। মহিলাগৰাকীৰ স্বামীৰ পূৰ্বেই মৃত্যু ঘটিছে। মৃত মহিলাগৰাকীৰ নাম সুশীলা ত্ৰিপাঠী।
সুশীলা ত্ৰিপাঠীয়ে পুত্ৰৰ সৈতে কাইজাৰবাগৰ বাংলা টোলা অঞ্চলত বাস কৰিছিল। পিটবুল কুকুৰটোৰ বাহিৰেও ঘৰটোত লেব্ৰাডৰ জাতৰ আন এটা পোহনীয়া কুকুৰো আছে। তথ্য অনুসৰি সুশিলাই ঘৰৰ চাদত পিটবুলটোক খোজ কঢ়াবলৈ লৈ গৈছিল। সেইসময়তে পিটবুলৰ ডিঙিত বান্ধি থোৱা শিকলিডাল খুলি দিয়া হৈছিল। তাৰ পিছত হঠাতে সুশীলাক আক্ৰমণ কৰে কুকুৰটোৱে। কুকুৰটোৱে এনেদৰে কামুৰিছিল যে সুশীলা ত্ৰিপাঠীৰ দেহৰ পৰা মাংস এৰাই আহিছিল।
বৃদ্ধা সুশীলাই প্ৰাণৰক্ষাৰ বাবে চিঞৰিছিল যদিও পিটবুলৰ কবলৰ পৰা নিজকে মুক্ত কৰিব নোৱাৰিলে। পিটবুলৰ কামোৰৰ ফলত তেওঁৰ পেট, মূৰ আৰু মুখৰ পৰা বেয়াকৈ তেজ ওলাইছিল।
পিছত বনকৰা মহিলাগৰাকী ঘৰলৈ অহাত সুশীলাক মাটিত পৰি থকা দেখি তেওঁ আচৰিত হৈ পৰে। তেওঁ পুত্ৰ অমিতক ফোন কৰে। লগে লগে অমিত জিমৰ পৰা ঘৰলৈ আহি তেজেৰে লুটুৰি-পুতুৰি হৈ পৰি থকা মাতৃক চিকিৎসালয়লৈ লৈ যায়। কিন্তু তেওঁৰ জীৱন ৰক্ষা কৰিব পৰা নগ'ল। চিকিৎসকে জনোৱা মতে অত্যধিক ৰক্তক্ষৰণৰ বাবে মহিলাগৰাকীৰ মৃত্যু হয়।
এই ঘটনাই অঞ্চলজুৰি গভীৰ শোকৰ ছাঁ পেলাইছে।
Continue Reading
