ঘৰৰ থাকিলেও কামৰ বাবে ব্যতিব্যস্ত কৰে নেকি অফিচৰ বছে? এইবাৰ আপোনাৰ হাতত আছে এইপাত অস্ত্ৰ...

ডিজিটেল ডেস্ক : ‘অফিচতো কাম কৰিম, ঘৰত আহিও সেই অফিচৰ কাম মুঠতে নোৱাৰা হৈছোঁ আৰু মই…’ কোম্পানীৰ চাকৰিত কৰা লোকসকলে সন্মুখীন হোৱা এয়া এক গতানুগতিক সমস্য৷ অফিচত পুৱা ৯বজাৰ পৰা সন্ধিয়া ৫ বজালৈ অবিৰতভাৱে কৰ্মচাৰীসকলে কাম কৰিব লগা হয়৷

বৰ্তমান বহুজাতিক কোম্পানীসমূহে এটা নিয়ম বান্ধি দিছে যে, অফিচ শেষ হোৱাৰ পাছতো আপুনি ঘৰতো প্ৰয়োজন সাপেক্ষে অফিচৰ কিছু কাম কৰিব লগা হ’ব পাৰে৷ এই কামটো যে শতকৰা ৯৯% বাবেই হৈ পৰে একেবাৰে মূৰৰ কামোৰণি সদৃশ৷ কিয়নো অফিচত ৮-৯ ঘণ্টা কাম কৰাৰ পাছত কোনো মানুহে আকৌ ঘৰত গৈ কাম কৰিবলৈ মানসিকভাৱে একেবাৰে প্ৰস্তুত নহয়৷

শেহতীয়াকৈ, এই সমস্যৰ পৰা নাগৰিকক মুক্তি দিবলৈ পৰ্তুগীজ চৰকাৰে গ্ৰহণ কৰিছে এক নতুন পদক্ষেপ৷ চৰকাৰে নিৰ্দেশনা জাৰি কৰিছে যে, কৰ্মচাৰীসকলক তেওঁলোকৰ অফিচৰ সময়ৰ বাদে আন কোনো সময়তে অফিচৰ যিকোনো কাম লৈ ফ’ন, মেছেজ কৰিব নোৱাৰিব৷ কৰ্মচাৰীসকলে তাতোধিক কামৰ বোজা লোৱাৰ ফলত মানসিক সন্তুলন হেৰুওৱাৰ বাবে পৰ্তুগীজ চৰকাৰে এই সিদ্ধান্ত গ্ৰহণ কৰিছে৷ এই আইনখন পৰ্তুগীজ সংসদত ইতিমধ্যে গৃহীত হৈছে আৰু আইনখনলৈ বিৰোধী পক্ষইও পূৰ্ণ সমৰ্থন আগবঢ়াইছে৷

আইনখন ইমানেই কঠোৰভাৱে প্ৰণয়ন কৰিছে যে, যদি অফিচৰ কোনো মুৰব্বীয়ে যদি এই আইনখন ভংগ কৰে তেতিয়া আইন উলংঘনকাৰীৰ বিৰুদ্ধে মানুহে পুলিচৰ কাষ চাপিব পাৰে আৰু তেওঁৰ কাৰাবাসৰ শাস্তি পৰ্যন্ত হ’ব পাৰে৷ আইনখনত লগতে এইটো কোৱা হৈছে যে, যিসকল কৰ্মচাৰীৰ তেওঁলোকৰ সন্তানৰ বয়স ৪ বছৰ হোৱা নাই, সেইসকলে অফিচৰ ঊৰ্ধ্বতম কৰ্তৃপক্ষৰ আগতীয়া অনুমতি নোহোৱাকৈ ছুটী ল’ব পাৰিব৷ পৰ্তুগালৰ শ্ৰমমন্ত্ৰী আনা মেণ্ডেছে কয় যে, কৰ্মচাৰীসকলৰ বাবে গ্ৰহণ কৰা এই আইনখন নিশ্চিতভাৱে ফলদায়ক হ’ব আৰু কৰ্মচাৰীসকলে ইয়াৰ জৰিয়তে যথেষ্ট মানসিক শান্তি লাভ কৰিব৷ মন্ত্ৰীগৰাকীয়ে লগতে কয় যে, পৰ্তুগীজ চৰকাৰে গ্ৰহণ কৰা এই আইনখন অনাগত দিনত বিশ্বৰ সকলো ৰাষ্ট্ৰৰ বাবে হ’ব অনুকৰণীয়৷