গ্ৰন্থ লিখি আদালতৰ ৰোষত কংগ্ৰেছ নেতা ছলমান খুৰছিদ...

লক্ষ্ণৌঃ লক্ষ্ণৌৰ এখন আদালতে জ্যেষ্ঠ কংগ্ৰেছ নেতা ছলমান খুৰছিদৰ বিৰুদ্ধে এখন এজাহাৰ দাখিলৰ নিৰ্দেশ দিছে। ছলমান খুৰছিদে তেওঁৰ ‘ছানৰাইজ অ’ভাৰ অযোধ্যা: নেশ্যনহুড ইন আৱাৰ টাইম’ নামৰ গ্ৰন্থখনত 'সনাতন' হিন্দুধৰ্মক আইছিছ নামৰ সন্ত্ৰাসবাদী সংগঠনৰ সৈতে তুলনা কৰাৰ অভিযোগ উত্থাপিত হৈছে। ধৰ্মীয় অনুভূতিত আঘাত হনা বুলি দাবী কৰিছে বিভিন্নজনে। অযোধ্যাৰ ঘটনাক কেন্দ্ৰ কৰি হিন্দুসকলৰ বিৰুদ্ধে বিতৰ্কিত মন্তব্য কৰাৰ অভিযোগত ছলমান খুৰছিদৰ বাসগৃহতো আক্ৰমণ কৰিছিল বিভিন্নজনে। আনহাতে, কিতাপখনৰ প্ৰকাশ আৰু বিক্ৰীৰ ওপৰত স্থগিতাদেশ বিচাৰি দিল্লী উচ্চ ন্যায়ালয়তো ৰুজু হৈছিল গোচৰ।

শেহতীয়াকৈ, অতিৰিক্ত মুখ্য ন্যায়িক দণ্ডাধীশ শান্তনু ত্যাগীয়ে প্ৰাক্তন কেন্দ্ৰীয় মন্ত্ৰীগৰাকীৰ বিৰুদ্ধে এখন এজাহাৰ পঞ্জীয়নৰো নিৰ্দেশ দিছে। আদালতে ইতিমধ্যে বক্সীৰ পুখুৰী আৰক্ষী থানাৰ ভাৰপ্ৰাপ্ত বিষয়াসকলক আইনৰ প্ৰাসংগিক ব্যৱস্থাৰ অধীনত এখন এজাহাৰ দাখিল কৰিবলৈ আৰু গোচৰটোৰ সঠিক তদন্তৰ বাবে নিৰ্দেশ দিছে। এজাহাৰৰ এটা প্ৰতিলিপি অহা ৩ দিনৰ ভিতৰত আদালতলৈ প্ৰেৰণ কৰিব লাগিব বুলিও সদৰী কৰিছে অতিৰিক্ত মুখ্য ন্যায়িক দণ্ডাধীশ শান্তনু ত্যাগীয়ে। জানিবলৈ পোৱা মতে, কংগ্ৰেছ নেতাজনৰ বিৰুদ্ধে এজাহাৰ দাখিল কৰিবলৈ আৰক্ষী থানাত আবেদন দাখিল কৰা হৈছিল। কিন্তু আৰক্ষীয়ে কোনোধৰণৰ উচিত ব্যৱস্থা গ্ৰহণ নকৰা বাবে এইবাৰ আদালতৰ কাষ চাপিছে। ছলমান খুৰছিদৰ গ্ৰন্থখন প্ৰকাশৰ পাছৰ পৰাই তুমুল বিতৰ্কত সোমাই পৰা দেখা গৈছে।