গোৱালপাৰা আৰক্ষীৰ সফলতা! তিনিটা দুৰ্ধৰ্ষ ডকাইতক গ্ৰেপ্তাৰ

ডিজিটেল ডেস্কঃ গোৱালপাৰা তথা দুধনৈ সমজিলা আৰক্ষীৰ সফলতা। ডকাইতি কাণ্ডৰ ৪৮ ঘণ্টাৰ ভিতৰতে গ্ৰেপ্তাৰ তিনিটা ডকাইত। জব্দ ৭৫ হাজাৰ নগদ ধন। ধৃত ডকাইত কেইটা ক্ৰমে ৰাহুল কোচ, অপূৰ্ব ৰাভা আৰু অভিনাশ ৰাভা৷

দুধনৈ থানা এলেকাৰ ভিন্ন স্থানত অভিযান চলাই গ্ৰেপ্তাৰ কৰিবলৈ সক্ষম হয় ডকাইতকেইটাক। ধৃত তিনি ডকাইতৰ পৰা ডকাইতি কাণ্ডত ব্যৱহৃত এখন চাৰিচকীয়া AS08 8549 নম্বৰৰ বাহনো জব্দ কৰে আৰক্ষীয়ে ৷

উল্লেখ্য যে, শনিবাৰৰ পুৱতি নিশা ধূপধৰা আৰক্ষী থানাৰ এলেকাৰ টিপলাই বনগাঁও কলিতা পাৰাৰ সুশীল কলিতা আৰু তেওঁৰ পত্নী নমিতা কলিতাক প্ৰহাৰ কৰি, আক্ৰমণ চলাই লুটিছিল ২০ লক্ষাধিক টকা মূল্যৰ সোণৰ আ-অলংকাৰ আৰু নগদ দেৰ লক্ষাধিক টকা ৷ আৰক্ষীয়ে ডকাইত তিনিটাক গ্ৰেপ্তাৰ কৰিবলৈ সক্ষম হয় যদিও ডকাইতৰ গেংটোৰ অন্য সদস্য সকল এতিয়াও পলাতক অৱস্থাত আছে ৷ অৱশ্যে ডকাইতৰ পৰা সোনৰ আ-অলংকাৰ খিনি এতিয়াও উদ্ধাৰ কৰিবলৈ সক্ষম হোৱা নাই আৰক্ষীয়ে ৷

দুধনৈ সমজিলা আৰক্ষী অধিক্ষক নূপুৰ ৰঞ্জন নেওঁগৰ নেতৃত্বত ধূপধৰা আৰু দুধনৈ আৰক্ষী থানাৰ ভাৰপ্ৰাপ্ত আৰক্ষী বিষয়াৰ সহযোগত ওৰে নিশা ডকাইতি বিৰোধী চলিছিল অভিযান । শনিবাৰে সংঘটিত ডকাইতি কাণ্ডত ডকাইতৰ আক্ৰমণত গুৰুতৰভাৱে আহত হৈছিল কলিতা দম্পতী।