ডিজিটেল ডেস্ক : তথাকথিত গোৰক্ষকৰ হাতত পুনৰ প্ৰাণ গ’ল সংখ্যালঘু লোকৰ। গোৰক্ষকৰ নাম লৈ বাটে-পথে একাংশ দুষ্কৃতিকাৰীয়ে সন্ত্ৰাস চলাই অহাটো এতিয়া এক সাধাৰণ কথাত পৰিণত হৈছে।পুনৰ এনে দুষ্কৃতিকাৰীৰ নৃশংসতাৰ বলি হৈছে এজন লোক। এটা ভাইৰেল ভিডিঅ’ত দেখা গৈছে যে, এজন সংখ্যালঘু লোকক একাংশ তথাকথিত গোৰক্ষকে নানা নিৰ্যাতন চলায়। এইসকল লোকৰ আক্ৰমণত লোকজনৰ মৃত্যু হয় আৰু তাৰ পাছতে তেওঁক এটা খাৱৈত পুতি থোৱা বুলি অভিযোগ উঠিছে। বিহাৰত এই ঘটনা সংঘটিত হৈছে।
আক্ৰমণকাৰী লোকসকলৰ নিষ্ঠুৰতাৰ নিদৰ্শন দাঙি ধৰি লোকজনক আক্ৰমণকাৰীসকলে পেট্ৰ’ল ঢালি জ্বলাই দিয়া বুলিও অভিযোগ উঠিছে। লোকজনৰ মৃতদেহত নিমখ ঢালি দি পুতি থোৱা বুলিও অভিযোগ উঠিছে যাতে, মৃতদেহটো সোনকালে পচি যায়। জনতা দল ইউনাইটেডৰ এগৰাকী সদস্য তথা বিহাৰৰ সমষ্টিপুৰ জিলাৰ বাসিন্দা ভুক্তভোগী মহম্মদ খলিল আলম নামৰ লোকজনে আক্ৰমণকাৰী কেইজনক হাতে-ভৰিয়ে ধৰি তেওঁক মাৰ-ধৰ নকৰিবলৈ অনুৰোধ কৰা দেখা গৈছিল। কিন্তু তেওঁৰ অনুৰোধ তথা প্ৰাৰ্থনাত ক্ষান্ত নহ’ল আক্ৰমণকাৰীকেইজন।
ভিডিঅ’টোত আক্ৰমণকাৰীকেইজন দৃষ্টিগোচৰ হোৱা নাই। কিন্তু তেওঁলোকে নানা ভয়-ভাবুকিৰে গো সৰবৰাহ আৰু গো মাংস বিক্ৰী সম্পৰ্কত বিভিন্ন প্ৰশ্ন কৰা শুনিবলৈ পোৱা যায়। আনকি লোকজনে কিমান গোমাংস তেওঁৰ জীৱনত খাইছে আৰু ল’ৰা ছোৱালীক খুৱাইছে সেই সম্পৰ্কতো প্ৰশ্ন কৰে আক্ৰমণকাৰীকেইজনে।
এই ঘটনাৰ বিষয়ে পোহৰলৈ অহাৰ পাছতে তীব্ৰ চাঞ্চল্যৰ সৃষ্টি হৈছে। ৰাজ্যখনৰ বিৰোধী দলৰ নেতা তেজস্বী যাদৱে ৰাজ্যখনৰ আইন শৃংখলা পৰিস্থিতি সম্পৰ্কত প্ৰস্ন উত্থাপন কৰি কয় যে, এনে ঘটনাই চৰকাৰৰ ব্যৰ্থতাকে সূচাইছে। দেশত সাম্প্ৰদায়িক ঘৃণা তথা এটা বিশেষ ধৰ্মীয় সম্প্ৰদায়ৰ লোকৰ প্ৰতি এনে নিষ্ঠুৰতা এতিয়া অতি উদ্বেগৰ বিষয় হৈ পৰিছে।
