গোপনে অধ্যয়ন কৰি দশম শ্ৰেণীত উত্তীৰ্ণ ৫৩ বছৰীয়া মাতৃ ! অভিযন্তা পুত্ৰৰ গৰ্বত ওফন্দিল বুকু

প্ৰসাদ জম্ভালে নামৰ এজন যুৱক মাষ্টাৰকাৰ্ডৰ অভিযন্তা। প্ৰসাদে মাতৃ কল্পনাৰ কাহিনী শ্বেয়াৰ কৰিছে ছ’চিয়েল নেটৱৰ্কিং ছাইটত। তেওঁ জনোৱা মতে, তেওঁৰ মাতৃয়ে দশম শ্ৰেণীৰ পৰীক্ষাত সুন্দৰকৈ উত্তীৰ্ণ হৈছে। যুৱকজনৰ মাতৃয়ে প্ৰমাণ কৰিলে যে জীৱনত যিকোনো সময়তে শিকিব পাৰি। বয়স মাথোঁ এটা সংখ্যাহে। ধৈৰ্য্য আৰু কঠোৰ পৰিশ্ৰম কৰিলেই এজন ব্যক্তিয়ে যিকোনো সময়তে সাফল্য অৰ্জন কৰিব পাৰে। 

প্ৰসাদ জম্ভালে লিখিছে যে ‘‘মাৰ ১৬ বছৰ বয়সত তেওঁৰ দেউতাকৰ মৃত্যু হৈছিল আৰু তাৰ পিছত ঘৰখনলৈ আৰ্থিক সংকট নামি আহিছিল। এনে অৱস্থাত ভাই-ভনীৰ শিক্ষা অব্যাহত ৰাখিবলৈ তেওঁ পঢ়া-শুনা এৰি কাম আৰম্ভ কৰিলে। যোৱা বছৰ মা কিবা কামত চৰকাৰী স্কুললৈ গৈছিল। তাত এগৰাকী শিক্ষয়িত্ৰীয়ে তেওঁৰ শিক্ষাৰ বিষয়ে সুধিছিল। মায়ে দশম উত্তীৰ্ণ হোৱা নাই বুলি শিক্ষয়িত্ৰীগৰাকীয়ে গম পালে। শিক্ষয়িত্ৰীগৰাকীয়ে মাক ক’লে যে চৰকাৰী আঁচনিৰ অধীনত তেওঁ পুনৰ দশম শ্ৰেণীৰ পৰীক্ষাত অৱতীৰ্ণ হ’ব পাৰে। অফলাইন, অনলাইন প্ৰশিক্ষণ, কিতাপ আদিৰ সকলো খৰচ চৰকাৰে বহন কৰিব। যোৱা বছৰৰ ডিচেম্বৰৰ পৰা মায়ে পুনৰ পঢ়া-শুনা আৰম্ভ কৰিলে। মায়ে মোৰ পৰা এই কথা লুকুৱাই ৰাখিছিল। মই আয়াৰলেণ্ডত থাকো। যেতিয়াই আয়াৰলেণ্ডৰ পৰা মই ফোন কৰিছিলোঁ, তেতিয়াই সুধিছিলোঁ মা ক’ত? মোক কৈছিল যে মা ফুৰিবলৈ গৈছে। মই তেতিয়া ভাবিছিলো যে মাৰ ফুৰাৰ প্ৰতি কিয় ইমান আগ্ৰহ বৃদ্ধি পাইছে। তেওঁ যে স্কুললৈ যায় সেয়া মই নাজানিছিলো। একেখন চালিৰ তলত বাস কৰা দেউতা আৰু ভাইটিৰ পৰা মায়ে এমাহ ধৰি এই কথা লুকুৱাবলৈ সক্ষম হ’ল৷ 

প্ৰসাদে লগতে লিখে যে, ‘মই এদিন ঘৰলৈ আহোঁতে মায়ে এখন মাৰ্কশ্বীট দেখুৱালে। যিটো দেখি মই আচৰিত হ’লোঁ৷ মা দশম শ্ৰেণীৰ পৰীক্ষাত উত্তীৰ্ণ হৈছে। প্ৰতিটো বিষয়তে তেওঁ বহুত ভাল নম্বৰ পাইছে। ইমান বছৰৰ পাছতো তেওঁ সকলো বিষয়তে ভাল প্ৰদৰ্শন কৰিছিল। মোৰ মা কল্পনাই ৭৯.৬০ শতাংশ নম্বৰৰে দশম শ্ৰেণীৰ পৰীক্ষাত উত্তীৰ্ণ হ’ল। প্ৰসাদ জম্ভালে কয় যে ''মাক লৈ মই অতি গৌৰৱান্বিত। তেওঁৰ সাফল্যই আমাক বহুত সুখ প্ৰদান কৰিলে।’’

মহিলাগৰাকীক সকলোৱে বৰ্তমান শুভকামনা আৰু অভিনন্দন জনাই প্ৰশংসাৰে উপচাই পেলাইছে।