ডিজিটেল ডেস্কঃ গুজৰাটত তৈয়াৰ কৰা হৈছে এক বিশেষ চকলেট। সেই চকলেট তৈয়াৰ কৰিছে বিজেপিয়ে। কিয় বিশেষ এই চকলেট। এই চকলেট বিশেষ হোৱাৰ কাৰণ হ'ল চকলেটৰ পেকেটত বিজেপিৰ প্ৰতীক আৰু প্ৰধানমন্ত্ৰী নৰেন্দ্ৰ মোদীৰ ছবি আছে।
গুজৰাট বিজেপিৰ সভাপতি চি আৰ পাটিলে মঙলবাৰে কৈছিল যে ''বিজেপিয়ে দৰিদ্ৰ আৰু পুষ্টিহীন শিশুৰ বাবে পুষ্টিৰে সমৃদ্ধ এক বিশেষ প্ৰকাৰৰ চকলেট তৈয়াৰ কৰিছে। আমাৰ নিৰঞ্জন ভাইয়ে পুষ্টিহীন শিশুসকলৰ বাবে প্ৰস্তুত কৰা চকলেটৰ নমুনা মঙলবাৰে সংসদীয় দলৰ বৈঠকৰ পূৰ্বে সাংসদসকলক দিয়া হৈছিল। চকলেটৰ ৰেপাৰত আমি ভাৰতীয় জনতা পাৰ্টিৰ প্ৰতীক পদুম ফুল আৰু প্ৰধানমন্ত্ৰী নৰেন্দ্ৰ মোদীৰ এখন ছবি ৰাখিছো।''
উল্লেখ্য যে চকলেট মুকলিৰ কাৰ্যসূচীত মন্ত্ৰী আৰু সাংসদসকলক দিয়া হৈছিল এক বিশেষ টুপী। বিজেপিৰ সংসদীয় দলৰ বৈঠক আৰম্ভ হোৱাৰ আগতে বিজেপিৰ সকলো মন্ত্ৰী আৰু সাংসদক বিশেষ টুপী দিয়া হৈছিল। চাৰিখন ৰাজ্যত বিজয়ৰ পাছত আহমেদাবাদত এটা ৰোড শ্ব'ৰ সময়ত প্ৰধানমন্ত্ৰী মোদীয়ে পিন্ধা এই একেই টুপী পিন্ধিছিল। ইয়াৰ লগতে সাংসদসকলক এনাৰ্জী বুষ্টাৰ চকলেটো দিয়া হৈছিল।
এই টুপী আৰু চকলেট গুজৰাট বিজেপিয়ে বিশেষভাৱে প্ৰস্তুত কৰিছে। টুপীটো দলৰ নেতাসকলে বহুত ভাল পাইছে। দিল্লীত বিজেপি সংসদীয় দলে এই টুপী আৰু এনাৰ্জী বুষ্টাৰ চকলেটৰ অৰ্ডাৰ কৰিছে। প্ৰায় ৪০০ জন নেতাক বিজেপিৰ বিশেষ টুপী দিয়া হৈছিল। টুপীত অঁকা হৈছে বিজেপিৰ প্ৰতীক।
Continue Reading
