ডিজিটেল ডেস্ক: দেশত ন্যায় ব্যৱস্থা বাহাল থকাৰ পাছতো ন্যায় ব্যৱস্থালৈ অপেক্ষা নকৰি আইন হাতত তুলি লোৱাৰ প্ৰৱণতা দিনক দিনে বাঢ়ি আহিছে৷ সম্প্ৰতি বুলডজাৰ ন্যায়ক লৈ সৰ্বত্ৰ চৰ্চা চলি আছে৷ এই সন্দৰ্ভত কঠোৰ হৈ পৰিছে উচ্চতম ন্যয়ালয়৷
এটা পৰিয়ালৰ সদস্য এজনৰ ওপৰত অপৰাধৰ অভিযোগ উত্থাপন হোৱাৰ পাছত শাস্তি স্বৰূপে পৌৰসভাৰ কৰ্তৃপক্ষই ব্যক্তিজনৰ ঘৰ বুলডজাৰ লৈ ভাঙি পেলোৱাৰ ভাবুকি দিছিল। এই ঘটনা সন্দৰ্ভত হস্তক্ষেপ কৰি ভাৰতৰ উচ্চতম ন্যায়ালয়ে কয় যে অনাধিকাৰ বুলডজাৰ চলোৱা কাৰ্য্য দেশৰ আইনৰ ওপৰত বুলডজাৰ চলোৱাৰ দৰে বুলি মন্তব্য কৰে৷
প্ৰাপ্ত তথ্য অনুসৰি গুজৰাটৰ খেদা জিলাৰ কথলালত থকা এটুকুৰা ভূমিৰ আন এজন লোকে নিজৰ বুলি দাবী কৰাক লৈ তেওঁৰ বিৰুদ্ধে ২০২৪ চনৰ ১ ছেপ্টেম্বৰত এটা গোচৰ ৰুজু কৰা হৈছিল। আবেদনকাৰীয়ে জানিবলৈ দিয়া মতে এফআইআৰ ৰুজু হোৱাৰ পাছত পৌৰনিগমৰ বিষয়াসকলে তেওঁৰ ঘৰত বুলডজাৰ জৰিয়তে ভাঙি পেলোৱাৰ ভাবুকি প্ৰদান কৰিছিল। ইয়াৰ পাছতে ব্যক্তিজনে ন্যায় বিছাৰি উচ্চতম ন্যায়ালয়ৰ কাষ চাপে। আবেদনকাৰীৰ অধিবক্তাই অভিযুক্ত পৰিয়ালটোৰ তিনিটা প্ৰজন্মই প্ৰায় দুটা দশক ধৰি সেই ভূখণ্ডত বাস কৰি আহিছে বুলি সদৰি কৰিছে।
উল্লেখযোগ্য যে ন্যায়াধীশ হিৰ্ষিকেশ ৰায়ৰ নেতৃত্বৰ তিনিজনীয়া বিচাৰপীঠে কয় যে ‘ৰাজ্যৰ কাৰ্যকলাপ সংবিধানিক আইনৰ দ্বাৰা পৰিচালিত হয় তেনে স্থলত পৰিয়ালৰ এজন সদস্যৰ অপৰাধৰ বাবে আন সদস্যসকলক বা তেওঁলোকৰ বাসগৃহ ধ্বংশ কৰাটো ন্যায় সংগত নহয়৷ যিখন দেশত আইনে সৰ্বোচ্চ, কোনো আইনৰ উৰ্ধত নহয় তেনে স্থলত আদালত নিৰ্লিপ্ত হৈ থাকিব নোৱাৰে৷’ এই দৰে আইন হাতত তুলি লোৱাৰ বৰ্ধিত ঘটনাই দেশৰ আইনী ব্যৱস্থাৰ ওপৰত প্ৰশ্ন উত্থাপন কৰিছে৷
Continue Reading
