গৰ্ভৱতী মহিলা কৰ্মচাৰীক লৈ ভাৰতীয় ষ্টেট বেংকৰ নিৰ্দেশনাত প্ৰতিক্ৰিয়া

ডিজিটেল ডেস্ক: ভাৰতীয় ষ্টেট বেংকে কালি এক নিৰ্দেশনা জাৰি কৰিছে। এই নিৰ্দেশনা অনুসৰি, তিনি মাহতকৈ অধিক গৰ্ভৱতী মহিলা কৰ্মচাৰীসকলক ‘অস্থায়ীভাৱে অযোগ্য’ বুলি গণ্য কৰা হ’ব। এনে এগৰাকী মহিলাই সন্তান প্ৰসৱৰ পাছত চাৰি মাহৰ ভিতৰত পুনৰ কাৰ্যালয়ত যোগদান কৰিব পাৰে। এছবিআইয়ে নতুন নিযুক্তি বা পদোন্নতিপ্ৰাপ্ত লোকসকলৰ বাবে শেহতীয়া চিকিৎসা ফিটনেছ নিৰ্দেশনাত কৈছে যে তিনি মাহৰ কম গৰ্ভৱতী এগৰাকী মহিলাক উপযুক্ত বুলি গণ্য কৰা হ’ব। ইয়াৰ পূৰ্বে ছয় মাহৰ গৰ্ভৱতী মহিলাসকলকো কেইবাটাও চৰ্তৰ সৈতে বেংকত কাম কৰিবলৈ অনুমতি দিয়া হৈছিল। অৱশ্যে, কৰ্মচাৰীগৰাকীয়ে প্ৰসূতি বিশেষজ্ঞ চিকিৎসকৰ পৰা প্ৰমাণপত্ৰ দাখিল কৰিব লাগিব, যিয়ে নিশ্চিত কৰে যে সেই সময়ছোৱাত বেংকত কাম কৰিলে মহিলাগৰাকীৰ গৰ্ভধাৰণ বা ভ্ৰূণৰ স্বাভাৱিক বিকাশত কোনো সমস্যা নহ’ব। লগতে তেওঁৰ গৰ্ভপাত নহ’ব। এই নিয়মক লৈ অসন্তুষ্টি প্ৰকাশ কৰি দিল্লী মহিলা আয়োগৰ মুৰব্বী স্বাতী মালিৱালে টুইট কৰি কয় যে, দেখা গৈছে যে ভাৰতীয় ষ্টেট বেংকে ৩ মাহতকৈ অধিক গৰ্ভৱতী মহিলাক সেৱাত যোগদান কৰাত বাধা দিবলৈ নিৰ্দেশনা জাৰি কৰিছে আৰু তেওঁলোকক ‘অস্থায়ীভাৱে অযোগ্য’ বুলি ঘোষণা কৰিছে। এয়া বেংক কৰ্তৃপক্ষৰ বৈষম্যমূলক আৰু অবৈধ সিদ্ধান্ত৷ কিয়নো, ই আইনৰ অধীনত প্ৰদান কৰা মাতৃত্বকালীন লাভালাভক প্ৰভাৱিত কৰিব পাৰে। আমি তেওঁলোকক এই মহিলা বিৰোধী নিয়ম প্ৰত্যাহাৰৰ দাবীত এখন জাননী জাৰি কৰিছোঁ। স্বাতী মালিৱালে টুইট কৰা এক জাননীত দিল্লী মহিলা আয়োগে (ডিচিডব্লিউ) কৈছে যে এছবিআইয়ে ৩১ ডিচেম্বৰৰ এক বিজ্ঞপ্তিত যথাযথ প্ৰক্ৰিয়াৰ জৰিয়তে নিৰ্বাচিত হোৱা স্বত্বেও তিনি মাহতকৈ অধিক গৰ্ভৱতী মহিলাসকলক কামত যোগদান কৰিবলৈ বাধা দিছে। ভাৰতীয় ষ্টেট বেংকে এতিয়ালৈকে বিষয়টোত কোনো সঁহাৰি দিয়া নাই। দিল্লী মহিলা আয়োগে এছবিআইক মঙলবাৰৰ ভিতৰত জাননীখনৰ সঁহাৰি দিবলৈ নিৰ্দেশ দিছে৷