ডিজিটেল ডেস্ক: হাজোৰ কৈৱৰ্তটোলাত ৰহস্যজনক মৃত্যু দুমহীয়া দেৱশিশুৰ। কৈৱৰ্তটোলা আয়ুষ্মান আৰোগ্য মন্দিৰ (উপ স্বাস্থ্য কেন্দ্ৰ)ত প্ৰতিষেধক গ্ৰহণ কৰাৰ পিছতে মৃত্যু হয় শিশুটিৰ৷
দিনৰ ভাগত স্বাস্থ্যকৰ্মীয়ে তিনিটাকৈ প্ৰতিষেধক প্ৰদান কৰাৰ পিছতে অসুস্থ হৈ পৰে কন্যা শিশুটি৷ তাৰপিছতে অসুস্থ শিশুটিক চিকিৎসাৰ বাবে লৈ যোৱা হয় হাজো সামূহিক স্বাস্থ্যকেন্দ্ৰলৈ৷
কিন্তু হাজো সামূহিক স্বাস্থ্যকেন্দ্ৰৰ শিশুৰোগ বিশেষজ্ঞই উন্নত চিকিৎসাৰ বাবে GMCHলৈ নিয়াৰ পৰামৰ্শ দিয়ে শিশুটিৰ অভিভাৱকক৷
অভিভাৱকৰ অভিযোগ, স্বাস্থ্যকৰ্মীয়ে তিনিটাকৈ প্ৰতিষেধক দিয়াৰ বাবেই হঠাতে অসুস্থ হৈ অকাল মৃত্যুক সাৱতি লয় দেৱশিশুটিয়ে৷
ইফালে, জন্মৰ পৰাই শিশুটি শাৰীৰিকভাবে দুৰ্বল হোৱা বাবেই এমহীয়া প্ৰতিষেধক দিয়াৰ পৰা বিৰত আছিল আয়ুষ্মান আৰোগ্য মন্দিৰৰ স্বাস্থ্যকৰ্মী।
তেনেসময়তে আজি তিনিটা প্ৰতিষেধক গ্ৰহণ কৰাৰ পিছতে আকষ্মিকভাৱে মৃত্যুমুখত পৰে শিশুটি৷
এই ঘটনাক কেন্দ্ৰ কৰি এতিয়া সমগ্ৰ অঞ্চলজুৰি পৰিছে শোকৰ ছাঁ৷
Continue Reading
