হাত-ভৰি কাটি ৰাজপথত ওলোমাই থ’লে যুৱকৰ মৃতদেহ , সন্দেহৰ আৱৰ্তলৈ অহা কি এই ‘নিহংগ’?

ডিজিটেল ডেস্ক : নৃশংস, বৰ্বৰ। হাত-ভৰি কাটি মৃতদেহ ওলোমাই থোৱা হ’ল ৰাজপথত। তালিবান কৱলিত আফগানিস্তানত পিছে এই ঘটনা সংঘটিত হোৱা নাই, এই ঘটনা সংঘটিত হৈছে এই দেশতে। শুকুৰবাৰে পুৱাই এই মৃতদেহটো দৃষ্টিগোচৰ হয় হাৰিয়ানাৰ সিংঘু সীমান্ত অঞ্চলত। কৃষকৰ প্ৰতিবাদস্থলীৰ সমীপতে এজন যুৱকৰ মৃতদেহ ওলোমাই ৰখা হয় পুলিচৰ বেৰিকেডত। মৃতদেহটোত কটা বাওঁহাতখন মাটিত পৰি আছিল। মৃতদেহটোৰ তলতে দোঙা বান্ধিছিল তেজে। তেওঁৰ ভৰিও নৃশংসতাৰে কাটি পেলোৱা হৈছিল আৰু তেওঁৰ দেহৰ বিভিন্ন ঠাইতো চোকা অস্ত্ৰৰে আঘাত কৰাৰ চিন আছিল।

অৰ্থাৎ অতি নৃশংস অত্যাচাৰেৰে লোকজনক হত্যা কৰিছিল অচিনাক্ত হত্যাকাৰীয়ে। এই সম্পৰ্কত উপ আৰক্ষী অধীক্ষক হংসৰাজে কয়, ‘আজি পুৱা প্ৰায় ৫ বজাত হাতত বান্ধি ওলোমাই থোৱা মৃতদেহটো উদ্ধাৰ হয়। কৃষকৰ প্ৰতিবাদস্থৱী হাৰিয়ানৰ শনিপাতৰ কুন্দিলত এই মৃতদেহটো উদ্ধাৰ হৈছে। এই কাৰ্য কোনে সংঘটিত কৰিছে সেয়া নিশ্চিত নহয় যদিও আৰক্ষীয়ে ঘটনা সন্দৰ্ভত এটা গোচৰ ৰুজু কৰি তদন্ত আৰম্ভ কৰিছে।’

আৰক্ষীয়ে প্ৰকাশ কৰা মতে, ভুক্তভোগী ৩৫-৩৬ বছৰীয়া যুৱকজন লখবীৰ সিং। হাৰিয়ানৰ তম তৰন জিলাৰ বাসিন্দা আছিল তেওঁ। হাৰমান সিং নামৰ এজন শ্ৰমিকৰ তুলি লোৱা সন্তান আছিল লখবীৰ। এই নৃশংস ঘটনাত শিখ সম্প্ৰদায়ৰ ‘যোদ্ধা’ সংগঠন ‘নিহংগ’(Nihangs) জড়িত আছে বুলি সন্দেহ কৰা হৈছে। হাৰিয়ানাৰ শনিপাতৰ কুন্দিলত এই নৃশংস কাণ্ড সংঘটিত হয়। এই হত্যাকাণ্ডৰ এটা চাঞ্চল্যকৰ ভিডিঅ’ পোহৰলৈ আহিছে। ভিডিঅ’টোত দেখা গৈছে যে, ‘নিহংগ’ৰ কেইজনমান লোক লখবীৰ সিঙৰ আশে-পাশে ঠিয় দি আছে। হাতৰ ঠাৰি কাটি পেলোৱা লোকজন যন্ত্ৰণা আৰু ভয়ত কোঙা হৈ মাটিত পৰি আছে। হত্যা কৰাৰ পাছত লোকজনৰ মৃতদেহ তালিবানী কায়দাৰে ৰাজপথত পুলিচৰ বেৰিকেডত ওলোমাই ৰখা হয়। কিহৰ বাবে এই নৃশংস হত্যাকাণ্ড সংঘটিত হ’ল সেয়াও স্পষ্ট হোৱা নাই। এই নৃশংস কাণ্ডক লৈ এতিয়া দেশজুৰি প্ৰতিক্ৰিয়াৰ সৃষ্টি হৈছে।