ডিজিটেল ডেস্কঃআজি এক ভয়ংকৰ দুৰ্ঘটনাৰ পৰা কথমপি প্ৰাণৰক্ষা পৰে উত্তৰপ্ৰদেশৰ মুখ্যমন্ত্ৰী যোগী আদিত্যনাথৰ । বাৰাণসীৰ পৰা হেলিকপ্টাৰেৰে উৰা মৰাৰ পিছতে আদিত্যনাথ উঠি যোৱা হেলিকপ্টাৰ খনত এটা চৰায়ে প্ৰচণ্ড জোৰেৰে খুন্দা মাৰে।
এক ভয়ংকৰ দুৰ্ঘটনাৰ উমান পাই হেলিকপ্টাৰৰ পাইলটে লগে লগে হেলিকপ্টাৰ খন জৰুৰী অৱতৰণ কৰিবলৈ বাধ্য হয়। এই ঘটনাত মুখ্যমন্ত্ৰী আদিত্যনাথ কোনো আঘাত নোপোৱাকৈ ৰক্ষা পৰে।
পাইলটে হেলিকপ্টাৰ খনৰ অৱতৰণত সামান্য পলম কৰিলেই যোগী আদিত্যনাথৰ জীৱনলৈ ভাবুকি নামি আহিলহেঁতেন বুলি বহুতে মন্তব্য কৰিছে।এই ঘটনাৰ পিছতে আদিত্যনাথে ৰাজ্য চৰকাৰৰ এখন বিমানত লক্ষ্ণৌলৈ যাত্ৰা কৰে। উত্তৰ প্ৰদেশৰ মুখ্যমন্ত্ৰী যোগী আদিত্যনাথ চৰকাৰী কাৰ্যসূচীলৈ বাৰাণসীলৈ আহিছিল।
শনিবাৰে, বাৰাণসীত তেওঁ কেইবাটাও প্ৰকল্প পৰিদৰ্শন কৰিছিল। যোৱানিশা তেওঁ বাৰাণসীত কটোৱাৰ পিছত আজি পুৱা লক্ষ্ণৌলৈ বুলি যাত্ৰা কৰিছিল। পৰিকল্পনা অনুসৰি তেওঁ দেওবাৰে পুৱা বাৰাণসী আৰক্ষী লাইনৰ পৰা হেলিকপ্টাৰেৰে লক্ষ্ণৌলৈ উভতি যাব বিচাৰিছিল।
কিন্তু যাত্ৰা আৰম্ভ কৰাৰ ক্ষন্তেক পিছতেই তেওঁ উঠি যোৱা হেলিকপ্টাৰত চৰায়ে খুন্দা মাৰে।অৱশ্যে পাইলটৰ বিচক্ষণতাৰ বাবেই যোগী আদিত্যনাথৰ প্ৰাণৰক্ষা পৰে।
বাৰাণসীৰ জিলা দণ্ডাধীশ কৌশলৰাজ শৰ্মাই কয় যে চৰাইৰ খুন্দাৰ পিছতেই পাইলটজনে হেলিকপ্টাৰৰ জৰুৰী অৱতৰণ কৰিবলৈ যি সিদ্ধান্ত লৈছিল সেয়া সঠিক সিদ্ধান্ত আছিল।
Continue Reading
