হিন্দু স্বাৰ্থই পাব লাগে সৰ্বোচ্চ অগ্ৰাধিকাৰ; পৰিয়াল, জাতি বা ভাষা হ’ব লাগে গৌণ : আৰ এছ এছ প্ৰধান

ডিজিটেল ডেস্ক : ‘মনত ৰাখিব প্ৰাথমিকতা হ’ব লাগে হিন্দু স্বাৰ্থ, অৰ্থাৎ ৰাষ্ট্ৰীয় স্বাৰ্থ। ভাষা, জাতিৰ দৰে অন্যান্য স্বাৰ্থক প্ৰাধান্য দিয়াটো উচিত নহয়,’- ৰাষ্ট্ৰীয় স্বয়ংসেৱক সংঘৰ (আৰএছএছ)ৰ মুৰব্বী মোহন ভাগৱতৰ এটি মন্তব্য৷ বুধবাৰে হায়দৰাবাদত অনুষ্ঠিত ভক্তি সন্ত শ্ৰী ৰামানুজাচাৰ্যৰ সহস্ৰাব্দ জন্ম জয়ন্তী উদযাপনত অংশগ্ৰহণ কৰি এই মন্তব্য আগবঢ়ায় ৰাষ্ট্ৰীয় স্বয়ংসেৱক সংঘৰ মুৰব্বীজনে৷ তেওঁৰ মতে, আন যিকোনো ব্যক্তিগত স্বাৰ্থতকৈ ৰাষ্ট্ৰীয় স্বাৰ্থক সদায় অগ্ৰাধিকাৰ দিয়া উচিত। ভাষণত তেওঁ কৈছিল, ‘মনত ৰাখিব প্ৰাথমিকতা হ’ব লাগে হিন্দু স্বাৰ্থ, অৰ্থাৎ ৰাষ্ট্ৰীয় স্বাৰ্থ। অন্যান্য স্বাৰ্থ যেনে ভাষা, জাতি আদি সকলো গৌণ স্বাৰ্থ হোৱা উচিত।’ লগতে তেওঁ কয় যে, ‘আমি এনে কোনো কামত জড়িত হোৱা উচিত নহয় যিয়ে আমাৰ মাজত যুঁজিবলৈ উদগনি দিয়ে। আমি সন্মানৰ সৈতে জীয়াই থাকিবলৈ শিকিব লাগে৷’ ভাগৱতে কয়, ফৰাচী বিপ্লৱৰ পাছত সমগ্ৰ বিশ্বই সমতাৰ কথা ক’বলৈ আৰম্ভ কৰিছিল৷ কিন্তু ভাৰতত, হাজাৰ বছৰৰ পূৰ্বে সমতাৰ বিশ্লেষণ দিয়া হৈছে৷ আৰএছএছৰ মুৰব্বীয়ে কয় যে, স্থানীয় পৰ্যায়ৰ সাধুসকলে মাহিলী একত্ৰিত হ’ব লাগে আৰু জনসাধাৰণক কেনেদৰে মহৎ জীৱনযাপনৰ বিষয়ে শিক্ষিত কৰিব লাগে আৰু একেধৰণে আলোচনা কৰিব লাগে, প্ৰতিটো পৰিয়ালে একেলগে প্ৰাৰ্থনা কৰিবলৈ, একেলগে খাবলৈ আৰু পৰিয়াল আৰু ৰাষ্ট্ৰীয় মূল্যবোধৰ বিষয়ে আলোচনা কৰিবলৈ সপ্তাহত কমেও এবাৰ একেলগে বহিব লাগিব। মধ্য প্ৰদেশৰ মুখ্যমন্ত্ৰী শিৱৰাজ সিং চৌহানেও অনুষ্ঠানটোত বক্তব্য ৰাখিছিল। প্ৰধানমন্ত্ৰী নৰেন্দ্ৰ মোদীয়ে ৫ ফেব্ৰুৱাৰীত চহৰৰ উপকণ্ঠৰ মুচিন্তালৰ চিন্না জিয়াৰ স্বামী আশ্ৰমত ৰামানুজাচাৰ্যৰ ২১৬ ফুট দৈৰ্ঘ্যৰ প্ৰতিমূৰ্তি উদ্বোধন কৰিছিল। এই মূৰ্তিটো উদ্বোধন কৰি ‘সমতাৰ প্ৰতিমূৰ্তি’ ৰামানুজাচাৰ্যক স্মৰণ কৰিছিল৷ যিয়ে বিশ্বাস কৰিছিল যে, জাতি আৰু ধৰ্মকে ধৰি জীৱনধাৰণৰ সকলো দিশতে সমতাৰ ধাৰণাটো প্ৰচাৰ কৰিছিল।