শ্রেষ্ঠ আন্তঃৰাষ্ট্ৰীয় কাহিনী চিত্ৰৰ বাবে তালিকাভুক্ত প্ৰথম ভাৰতীয় কথাছবি; 'অস্কাৰ'ৰ দৌৰত ভাৰতৰ 'হ'ম বাউণ্ড'

ডিজিটেল ডেস্ক: গ্ৰাম্য ভাৰতৰ দুজন বন্ধু আৰু তেওঁলোকৰ উচ্চাকাংক্ষাৰ বিষয়ৰ উচ্চ প্রশংসিত চলচ্চিত্র, নীৰজ ঘায়ৱানৰ 'হ'মবাউণ্ড' অস্কাৰ বঁটাৰ বাবে প্রতিযোগিতাত 'বেষ্ট ইণ্টাৰনেশ্যনেল ফিচাৰ ফিল্ম' (শ্রেষ্ঠ আন্তঃৰাষ্ট্ৰীয় কাহিনী চলচ্চিত্র) শিতানত আন ১৪খন চলচ্চিত্ৰৰ সৈতে 'শ্বর্ট লিষ্ট'ত (সংক্ষিপ্ত তালিকা) স্থান লাভ কৰিছে।

যোৱা মে' মাহত কাঁ চলচ্চিত্র মহোৎসৱত আন চাৰটেইন ৰিগাৰ্ড শিতানত প্রথম প্রিমিয়াৰ হোৱা 'হ'মবাউণ্ড'-এ এতিয়া অস্কাৰৰ বাছনি শিতানৰ বাবে আর্জেন্টিনাৰ 'বেলেন', ব্রাজিলৰ 'দ্য ছিক্রেট এজেন্ট', ফ্ৰান্সৰ 'ইট ৱাজ জাষ্ট এন এক্সিডেন্ট', জার্মানিৰ 'ছাউণ্ড অব্ ফলিং' আৰু ইৰাকৰ 'দ্য প্ৰেছিডেন্টছ কে'ক'ৰ সৈতে প্রতিদ্বন্দ্বিতা কৰিব লাগিব।

এইটো শিতানত শ্বর্ট লিষ্টত স্থান লাভ কৰা আন চলচ্চিত্ৰসমূহ হৈছে জাপানৰ 'কোকুহো, জর্ডানৰ 'অল দেছ লেফ্ট অব্ ইউ', নৰৱে'ৰ 'ছেন্টিমেন্টেল ভেলু', পেলেষ্টাইনৰ 'পেলেষ্টাইন ৩৬', দক্ষিণ কোৰিয়াৰ 'ন' আদাৰ চয়চ', স্পেইনৰ 'ছিৰাট', ছুইজাৰলেণ্ডৰ 'লে'ট শ্বিফ্ট', টাইৱানৰ 'লেফ্ট হেণ্ডেড গার্ল' আৰু টিউনিছিয়াৰ 'দ্য ভয়চ অব্ হিন্দ ৰাজাব।' কৰণ জোহৰ আৰু আদৰ পুনাৱালাই প্রযোজনা কৰা চলচ্চিত্ৰখনত মুখ্য চৰিত্ৰত অভিনয় কৰিছে ঈশান খট্টৰ, বিশাল জেঠৱা আৰু জাহ্নৱী কাপুৰে।

উল্লেখযোগ্য যে শ্রেষ্ঠ আন্তঃৰাষ্ট্ৰীয় কাহিনী চলচ্চিত্র (পূর্বে শ্রেষ্ঠ বিদেশী ভাষাৰ চলচ্চিত্ৰ) শিতানত অস্কাৰৰ শ্বৰ্টলিষ্টত স্থান লাভ কৰা 'হ'মবাউণ্ড' হৈছে ভাৰতৰ প্ৰথমখন চলচ্চিত্র। আশুতোষ গোৱাৰিকাৰৰ 'লগান'-এ ২০০২ চনত 'শ্রেষ্ঠ বিদেশী ভাষাৰ চলচ্চিত্র' শিতানৰ মনোনয়ন লাভকৰিছিল, তেতিয়া অস্কাৰৰ শ্বৰ্টলিষ্ট নাছিল। ২০১৮ চনতহে শ্বর্টলিষ্টৰ ব্যৱস্থা আৰম্ভ হয়। শ্রেষ্ঠ বিদেশী ভাষাৰ চলচ্চিত্র শিতানত মনোনয়ন লাভ কৰা আন দুখন ভাৰতীয় চলচ্চিত্ৰ হৈছে মেহবুব খানৰ 'মাদাৰ ইণ্ডিয়া' (১৯৫৭ চন) আৰু মীৰা নায়াৰৰ 'চালাম বোম্বে' (১৯৮৮ চন)।

মঙলবাৰে আন ১১টা শিতানৰো শ্বৰ্ট লিষ্ট ঘোষণা কৰা হয়। ৯৮ সংখ্যক একাডেমি এৱাৰ্ড বা অস্কাৰ বঁটাৰ বাবে মনোনয়নপ্রাপ্ত চলচ্চিত্ৰৰ নাম ঘোষণা কৰা হ'ব ২০২৬ চনৰ ২২ জানুৱাৰীত। ২০২৬ চনৰ ১৫ মাৰ্চত অৱেশ্যন হলিউডৰ ডলবি থিয়েটাৰত ৯৮ সংখ্যক অস্কাৰৰ বঁটা প্ৰদান অনুষ্ঠান অনুষ্ঠিত হ'ব। কাশ্মীৰী সাংবাদিক, লেখক, চিত্রনাট্যকাৰ বশ্বৰত পীৰৰ 'নিউয়র্ক টাইম'ত প্রকাশ পোৱা প্ৰবন্ধ 'টেকিং অমৃত হ'ম: এ ফ্রে'ণ্ডশ্বিপ, এ পেনডেমিক এণ্ড এ ডেথ বিছাই দ্য হাইৱে'ৰ অনুপ্ৰেৰণাৰে নিৰ্মাণ কৰা হৈছে 'হ'মবাউণ্ড'। এজন মুচলমান আৰু এজন দলিতৰ শৈশৱৰে পৰা থকা বন্ধুত্বৰ কাহিনীৰ চলচ্চিত্ৰখনৰ কাৰ্যবাহী প্রযোজক হৈছে হলিউডৰ কিংবদন্তি মার্টিন স্ক'ৰছেজে।

উৎসঃ দৈনিক জনমভূমি