ডিজিটেল ডেস্কঃ চীনৰ উল্লেখযোগ্য ধনী ব্যক্তি জেক মাই হঠাতে ঋণগ্ৰস্ত পাকিস্তানত ভৰি ৰখাৰ কথাই এতিয়া বিভিন্ন মহলত বেছ চৰ্চা লাভ কৰিছে৷ খবৰ অনুসৰি তেওঁ ২৯ জুনত পাকিস্তানলৈ যায় । তেওঁ তাত মাত্ৰ ২৩ ঘণ্টাৰ বাবে আছিল। অৱশ্যে, জেক মাৰ এই ভ্ৰমণৰ বিষয়ে আনকি সংবাদ মাধ্যমকো জানিবলৈ দিয়া হোৱা নাছিল৷ জানিব পৰা মতে চীনা প্ৰশাসনো এই ভ্ৰমণৰ বিষয়ে অজ্ঞাত আছিল৷
ঝি জিনপিঙে প্ৰশাসনৰ নতুন বেংক নীতিৰ বিষয়ে প্ৰশ্ন উত্থাপন কৰাৰ পিছৰে পৰা চীনা কোটিপতিজন শলঠেকত পৰিছে। বেইজিঙে তেওঁৰ গতিবিধিৰ ওপৰতো তীক্ষ্ণ নজৰ ৰাখিছে৷ পাকিস্তানৰ এখন বাতৰি কাকতৰ মতে জেক মাই ২৯ জুনত এখন ব্যক্তিগত বিমানেৰে পাকিস্তানলৈ গৈছিল। তেওঁ হংকঙৰ এখন বিমানেৰে বাংলাদেশ আৰু নেপাল ভ্ৰমণ কৰাৰ পিছত পাকিস্তানত উপস্থিত হৈছিল। চীনা ব্যৱসায়ীজনৰ সৈতে পাঁচজন চীনা নাগৰিকৰ লগতে এজন আমেৰিকান নাগৰিকো আছিল। তেওঁলোকে মাত্ৰ ২৩ ঘণ্টা পাকিস্তানত অতিবাহিত কৰাৰ পিছত দেশ খন ত্যাগ কৰিছিল।
এই ভ্ৰমণৰ পিছত প্ৰশ্ন উত্থাপন হৈছে জেক মা ঋণগ্ৰস্ত পাকিস্তানলৈ কিয় গৈছিল? বিশেষজ্ঞসকলৰ মতে চীনা কোটিপতিজনে সম্ভৱতঃ তেওঁৰ ব্যৱসায় বৃদ্ধি কৰিবলৈ পাকিস্তানলৈ গৈছিল। এই ভ্ৰমণৰ সময়ত মাই কেইবাজনো পাক বিষয়াৰ সৈতে বৈঠক কৰিছিল বুলি বিশেষ সূত্ৰই জনাইছে। অৱশ্যে, বৈঠকৰ বিষয়ে কোনো আনুষ্ঠানিক ঘোষণা কৰা হোৱা নাই। যোৱা বছৰ জেক মাই চীন এৰি জাপানলৈ গুচি গৈছিল বুলি খবৰ ওলাইছিল। জাপানত বাস কৰাৰ উপৰি জেকে নিয়মীয়াকৈ আমেৰিকা আৰু ইজৰাইল ভ্ৰমণ কৰা বুলিও খবৰ পোৱা গৈছিল। তেওঁ জাপানৰ গ্ৰাম্য অঞ্চল ভ্ৰমণ কৰিছিল। এতিয়া পাকিস্তানো তেওঁৰ ভ্ৰমণৰ তালিকাত প্ৰৱেশ কৰিলে বুলি বহুতে আলোচনা কৰিছে ৷
Continue Reading
