ডিজিটেল ডেস্কঃ ৰাজস্থানৰ উদয়পুৰত দৰ্জী কানহাইয়ালালৰ নৃশংস হত্যাকাণ্ডই দেশজুৰি চাঞ্চল্যৰ সৃষ্টি কৰিছে। নুপুৰ শৰ্মাক সমৰ্থন কৰাৰ বাবে দুই মুছলমান যুৱকে কানহাইলালক শিৰচ্ছেদ কৰি যিদৰে হত্যা কৰিলে সেয়া দেখি সকলো ক্ষোভিত হৈ পৰিছে। এই বিষয়ত বলীউড আৰু টিভিৰ চেলিব্ৰিটিসকলেও নিজৰ প্ৰতিক্ৰিয়া প্ৰকাশ কৰিছে। দিনৰ পোহৰত হোৱা এই নিৰ্দয় হত্যাকাণ্ডই সকলোকে স্তম্ভিত কৰি তুলিছে। ২৮ জুনত কাপোৰ চিলাই কৰাৰ চলেৰে দুই মুছলমান যুৱক মহম্মদ ৰিয়াজ আখতাৰী আৰু গৌচ মহম্মদ হিন্দু দৰ্জী কানহাইয়ালালৰ দোকানলৈ আহিছিল।
মঙলবাৰে বিয়লি হত্যাকাৰী কেইজন কানহাইয়া লালৰ দোকানত গ্ৰাহকৰ ৰূপ লৈ প্ৰৱেশ কৰিছিল। লালে আনকি তেওঁলোকৰ দেহৰ জোখ-মাখো লৈছিল। ইয়াৰ পাছতেই কানহাইয়ালালক শিৰচ্ছেদ কৰি হত্যা কৰে দুই যুৱকে। আনকি কানহাইয়ালালক হত্যা কৰাৰ এটা ভিডিঅ’ও পোষ্ট কৰে হত্যাকাৰীয়ে। এই হত্যাকাণ্ডৰ সন্দৰ্ভত লাকী আলী, কংগনা ৰাণাউট, গৌহৰ খান, ৰণবীৰ শোৰে, অনুপম খেৰ, দেৱোলীনা ভট্টাচাৰ্য, কেআৰকে, স্বাৰা ভাস্কৰকে ধৰি বহু চেলিব্ৰিটিয়ে প্ৰতিক্ৰিয়া প্ৰকাশ কৰিছে। ধৰ্মৰ নামত কানহাইলালক যিদৰে হত্যা কৰা হৈছে সেয়া সকলোৱে তীব্ৰ সমালোচনা কৰিছে। কানহাইয়ালালৰ ন্যায়ৰ দাবী তুলিছে জনপ্ৰিয় কণ্ঠশিল্পী লাকী আলীয়ে।
তেওঁ লিখিছে যে – এজন ব্যক্তিক হত্যা কৰাটো সমগ্ৰ মানৱ জাতিক হত্যা কৰাৰ সমান। অনুগ্ৰহ কৰি তেওঁলোকক গুৰুতৰ শাস্তি প্ৰদান কৰক। ঠিক যেনেকৈ তেওঁলোকে ইছলামৰ নামত পাপ কাম কৰিছে।'' কংগনা ৰানাউটে লিখিছে, ''কানহাইলালৰ হত্যাকাণ্ডৰ ভিডিঅ' যিদৰে বনোৱা হৈছে সেয়া চাবলৈ সাহস নকৰো। মই অজ্ঞান হৈ পৰিছো।'' অনুপম খেৰে খং উজাৰি লিখিছে- ভয়ংকৰ...দুখ লাগিছে...খং উঠিছে। কেআৰকেয়ে টুইট কৰি লিখিছে- হজৰত মহম্মদে কেতিয়াও কাৰো শাৰীৰিক ক্ষতি কৰা নাছিল। সেইবাবেই এনে অপৰাধমূলক কাৰ্যকলাপ কোনেও নকৰিব।
ৰাজস্থানৰ উদয়পুৰত টেইলৰ কানহাইয়ালালে নুপুৰ শৰ্মাৰ বক্তব্যক সমৰ্থন কৰি পোষ্ট কৰিছিল। ইয়াৰ পাছতেই তেওঁ প্ৰাণনাশৰ ভাবুকিও লাভ কৰিছিল।কানহাইয়ালালে এই কথা আৰক্ষীকো জনাইছিল আৰু সুৰক্ষা বিচাৰিছিল কিন্তু তাৰপাছতো আৰক্ষীয়ে একো ব্যৱস্থা গ্ৰহণ নকৰিলে। ছয় দিনৰ বাবে দোকান বন্ধ কৰি নিজক তেওঁ আবদ্ধ কৰি ৰাখিছিল যদিও অৱশেষত মঙলবাৰে ব্যৱসায়ৰ বাবে দোকানখন মুকলি কৰে। ২৮ জুনত কাপোৰ চিলাই কৰাৰ অজুহাতত মহম্মদ ৰিয়াজ আখতাৰী আৰু গৌচ মহম্মদে কানহাইলালৰ দোকানলৈ আহিছিল আৰু দুয়ো নৃশংসভাৱে কানহাইলালক হত্যা কৰে।
Continue Reading
