ডিজিটেল ডেস্কঃ যদি কিবা কথাত আপোনাৰ মন হতাশাই আৱৰি ধৰিছে বা কিবা কথাত দুৰ্বল যেন অনুভৱ কৰিছে তেন্তে আপোনাৰ বাবে লৈ আনিছো এটা প্ৰেৰণাদায়ক কাহিনী। যি কাহিনীয়ে মনোবল বৃদ্ধি কৰিব আপোনাৰ। ব্ৰিটেইনৰ মাৰ্টিন হিবাৰ্ট নামৰ লোকজনে হুইল চেয়াৰত বহি আৰোহণ কৰিলে মাউণ্ট কিলিমাঞ্জাৰোত। এই খবৰে এতিয়া সকলোতে চৰ্চা লাভ কৰিছে। উল্লেখ্য যে মানচেষ্টাৰৰ ৪৫ বছৰীয়া লোকজন ২০১৭ চনত সেই অঞ্চলটোত সংঘটিত হোৱা বোমা বিস্ফোৰণৰ ফলত পক্ষাঘাতগ্ৰস্ত হৈছিল।
বোমা বিস্ফোৰণত আহত হোৱাৰ পাছত মাৰ্টিন হিবাৰ্টৰ মেৰুদণ্ডত গুৰুতৰভাৱে আঘাত লাগে, যাৰবাবে তেওঁ খোজ কাঢ়িব বা লৰচৰ কৰিব নোৱাৰা হ’ল। কিন্তু সেইটোৱেই তেওঁৰ মনোবল ভাঙিব পৰা নাছিল। মানসিকভাৱে অতি শক্তিশালী মাৰ্টিন হিবাৰ্ট। তেওঁ বিশেষভাৱে পৰিৱৰ্তিত হুইল চেয়াৰ ব্যৱহাৰ কৰি আফ্ৰিকাৰ আটাইতকৈ ওখ পৰ্বত বগাই দেখুৱাই দিলে যে মানুহে কৰিব নোৱাৰা কাম একো নাই। এজন প্ৰেৰণাদায়ক ব্যক্তি হিচাপে নিজৰ নামটো খোদিত কৰিবলৈ সক্ষম হ’ল মাৰ্টিন হিবাৰ্টে।
হিবাৰ্টে নিজৰ ফেচবুক প্ৰফাইলত শ্বেয়াৰ কৰা এটা ভিডিঅ’ত তেওঁ আৰোহণৰ সময়ত সন্মুখীন হোৱা প্ৰত্যাহ্বানৰ বিষয়ে কয়। মাৰ্টিন হিবাৰ্টে কয় “আমি এতিয়া কিলিমঞ্জাৰোৰ ওপৰত আছো। পাঁচ বছৰ আগতে মই হাস্পতালত আছিলো, প্ৰায় লৰচৰ কৰিব পৰা নাছিলো আৰু এতিয়া মই ইয়াত আছো, পাঁচ বছৰৰ পাছত কিলিমঞ্জাৰোৰ ওপৰত।’’ নেটিজেনসকলে মাৰ্টিন হিবাৰ্টৰ এই কৃতিত্বত সুখী হৈ অভিনন্দন বাৰ্তাৰে ভৰাই দিলে। মাৰ্টিন হিবাৰ্টৰ এই পোহৰমুখী যাত্ৰা অব্যাহত থাকিবলৈ অনেক লোকে জনালে শুভকামনা।
