অৱস্থা বেয়া পাকিস্তানৰ! নাগৰিকক কেৱল এক কাপ চাহ খোৱাৰ বাবে আহ্বান পাক চৰকাৰৰ

এই সন্দৰ্ভত প্ৰকাশ পোৱা প্ৰতিবেদন অনুসৰি আহছান ইকবালে কয় যে ''মই দেশৰ জনসাধাৰণক আহ্বান জনাইছো যে দৈনিক এক কাপহে চাহ খাওক। চাহ খোৱাৰ পৰিমাণ হ্ৰাস কৰক। কাৰণ আমি ক্ৰেডিটত চাহ আমদানি কৰি আছো। এই সময়ত এনে পদক্ষেপ লোৱাটো অতি প্ৰয়োজনীয়।'' ইয়াৰ সমান্তৰালকৈ মন্ত্রীগৰাকীয়ে ব্যৱসায়ীসকলক আহ্বান জনাই কয় যে ''দেশত বিদ্যুৎ সংকট অধিক গভীৰ হৈছে, গতিকে নিশা ৮.৩০ বজালৈ বজাৰসমূহ বন্ধ কৰি ৰাখিব লাগে৷'' 

শেহতীয়াকৈ পাকিস্তানৰ বিত্তমন্ত্ৰী মিফতা ইছমাইলে সতৰ্কবাণী দিয়াৰ সময়তে পাকিস্তানৰ অৰ্থনৈতিক অৱস্থাক শ্ৰীলংকাৰ সৈতে তুলনা কৰিছিল। মন কৰিবলগীয়া যে পাকিস্তান চৰকাৰে যোৱা মাহত আমদানি ব্যয় হ্ৰাস কৰিবলৈ ৪১টা সামগ্ৰী আমদানি কৰাত দুমাহৰ বাবে নিষিদ্ধ কৰিছিল। কিন্তু এই নিষেধাজ্ঞাৰ বাবে আমদানি বিল মাত্ৰ ৬০ কোটি ডলাৰ হ্ৰাস পাইছে, যিটো মুঠ আমদানি ব্যয়ৰ পাঁচ শতাংশ। মন্ত্ৰী আহছান ইকবালৰ এই মন্তব্যক লৈ টুইটাৰত চৰ্চা আৰম্ভ হৈছে। এজনে টুইটাৰত ধেমালি কৰি কয় যে ''দেশক চাহৰ কাপৰ সংখ্যা হ্ৰাস কৰিবলৈ পৰামৰ্শ দিয়া মন্ত্ৰীয়ে কোন নীতিৰ অধীনত কাশ্মীৰক লৈ যাব?'' এজন ব্যৱহাৰকাৰীয়ে লিখিছে ''আহছান ইকবালে সঁচাকৈয়ে আমাক চাহ খোৱা কমাবলৈ কৈছে নেকি? তেওঁলোকে সঁচাকৈয়ে আমাক ইমান মূৰ্খ বুলি ভাবেনে?'' 

উল্লেখ্য যে পাকিস্তানত বৰ্তমান প্ৰতি লিটাৰত গাখীৰৰ দাম ১২৬ টকা হোৱাৰ বিপৰীতে চাহপাতৰ দাম প্ৰতি কেজি ৯০০ টকা। চেনিৰ মূল্য প্ৰতি কেজিত ১০০ টকা। এনে অৱস্থাত পাকিস্তানত চাহৰ দাম প্ৰতি কাপত ৩০ৰ পৰা ৪০ টকা পৰ্যন্ত হৈছে। সেয়েহে পাক মন্ত্ৰীগৰাকীয়ে পাক নাগৰিকক চাহ কমকৈ খাবলৈ পৰামৰ্শ দিছে।