ডিজিটেল ডেস্ক : কৃত্রিম বুদ্ধিমত্তা (এআই)ৰ ব্যৱহাৰৰ ক্ষেত্ৰত কঠোৰ সুৰক্ষা বিধি প্ৰৱৰ্তনৰ বাবে ৰাষ্ট্ৰসংঘক আহ্বান জনাইছে এ আই কোম্পানীসমূহে। ৰাষ্ট্ৰসংঘৰ সাধাৰণ পৰিষদৰ সভাত ভাগ লোৱা অ'পেন এ আই, এনথ্র'পিক আদি শীর্ষ প্রযুক্তি প্রতিষ্ঠানৰ নেতৃত্বই বিশ্বৰ অভিভাৱক সংস্থাটোক আহ্বান জনাই কয় যে এ আয়ে বৰ্তমান আমাৰ দৈনন্দিন জীৱনযাত্রা সহজ কৰি তুলিছে। শিক্ষাৰ পৰা যুদ্ধ-বিগ্রহলৈ, চিকিৎসাৰ পৰা বাণিজ্য খণ্ডলৈ সকলোতে এ আইৰ ব্যৱহাৰ হৈছে।
কিন্তু শীঘ্রেই এ আই প্ৰযুক্তিৰ ওপৰত নিয়ন্ত্ৰণৰ ব্যৱস্থা নহ'লে ই মানৱ জাতিৰ প্ৰতি বিপদ মাতি আনিব। গতিকে এ আইৰ ব্যৱহাৰৰ ক্ষেত্ৰত কঠোৰ নীতি-নিয়ম প্ৰৱৰ্তন কৰাটো অতি প্রয়োজন হৈ পৰিছে বুলি প্রযুক্তি প্রতিষ্ঠানসমূহৰ শীর্ষ নেতৃত্বই মত প্রকাশ কৰে। ৰাষ্ট্ৰসংঘৰ সাধাৰণ পৰিষদৰ সভাত অ'পেন এ আইৰ মুখ্য কার্যবাহী বিষয়া ছেম অল্টমেন, এনথ্র'পিকৰ মুখ্য কাৰ্যবাহী বিষয়া ডাৰিঅ' অমোডেইকে ধৰি কেইবাটাও প্রযুক্তি কোম্পানীৰ শীর্ষ নেতৃত্ব উপস্থিত থাকে।
প্রযুক্তিবিদসকলে অনুষ্ঠানত কয় যে এ আইৰ ওপৰত এতিয়াই নিয়ন্ত্রণ নানিলে ভৱিষ্যতে ইয়াক নিয়ন্ত্রণ কৰাটো কঠিন হৈ পৰিব। গতিকে এই বিষয়ত ব্যৱস্থা ল'বলৈ ৰাষ্ট্ৰসংঘক প্রযুক্তিবিদসকলে আহবান জনায়।
উৎস: দৈনিক জনমভূমি
Continue Reading
