‘ইমিউনিটী বুষ্টাৰ’ৰ নামত প্ৰতি লিটাৰত ১০ হাজাৰ টকাত বিক্ৰী গাধৰ গাখীৰ

ডিজিটেল ডেস্কঃ গাখীৰ খালে পুষ্টি সাধন হয় বুলি কোৱা হয়। কিন্তু পুষ্টিৰ নামত বা ৰোগ প্ৰতিৰোধ ক্ষমতাৰ নামত আপোনাক গাধৰ গাখীৰ খাবলৈ দিলে খাবনে? আপুনি নাখালেও পিছে জাক জাক মানুহ গাধৰ গাখীৰ খাবলৈ দৌৰি গৈছে। পিছে কিয়? উত্তৰ এটাই, সেয়া হ'ল এই গাখীৰ খালে ৰোগ প্ৰতিৰোধ ক্ষমতা বহুত বেছি বৃদ্ধি পায় আৰু কৰ'নাৰ সৈতে যুঁজ দিব পাৰি।‘ইমিউনিটী বুষ্টাৰ’ৰ নামত বিক্ৰী হৈছে গাধৰ গাখীৰ। এই ঘটনা সংঘটিত হৈছে মহাৰাষ্ট্ৰৰ হিংগোলী জিলাত।

গাখীৰ বিক্ৰেতাই গাধৰ গাখীৰ প্ৰতি লিটাৰ দহ হাজাৰ টকাত বিক্ৰী কৰিছে। সেই স্থানত এই গাখীৰৰ চাহিদা ইমানেই বৃদ্ধি পাইছে যে হিংগোলীৰ গলিয়ে গলিয়ে ই বিক্ৰী হৈছে। ওচৰৰ জিলাৰ লোকসকলো এই খবৰ পাই হিংগোলীলৈ ঢপলিয়াই আহিছে। গাখীৰ বিক্ৰেতাই গ্ৰাহকক কয় যে ''গাধৰ গাখীৰ খাওক আৰু সুস্থ হৈ থাকক। এই গাখীৰ খালে সকলো ৰোগৰ পৰা ৰক্ষা পাব পাৰি। কৰোনা ৰোগকে ধৰি নিউমোনিয়া, জ্বৰ, কাহ, কফ আদি ৰোগ এই গাখীৰ খাই ভাল কৰিব পাৰি।'' গাখীৰ বিক্ৰেতা বালাজী মেচেৱাৰে কয় যে তেওঁ গাধৰ পৰা সতেজ গাখীৰ উলিয়াই বিক্ৰী কৰে। ই ৰোগৰ ক্ষেত্ৰত যথেষ্ট কাৰ্যকৰী। এক চামুচ গাখীৰৰ মূল্য ১০০ টকা আৰু এক লিটাৰ গাখীৰ দহ হাজাৰ টকাত বিক্ৰী হয়। নৱজাতক শিশুক এই জীৱবিধৰ গাখীৰ খুৱালে গোটেই জীৱনকাললৈ ই লাভদায়ক হয় বুলি দাবী কৰিছে গাখীৰ বিক্ৰেতাজনে। 

আনহাতে এই ঘটনাৰ সন্দৰ্ভত চিকিৎসক ভি এন ৰডগে কয় যে ''গাধৰ গাখীৰ প্ৰতি লিটাৰত ১০,০০০ টকাত বিক্ৰী কৰা হৈছে, এয়া বৰ আচৰিত কথা। এই গাখীৰ খালে কৰ'নাৰ দৰে মহামাৰীৰ পৰা আৰোগ্য হ'ব পাৰি বুলি কোৱা কথাটো একেবাৰে মিছা। কোনেও কাকো অন্ধভাৱে বিশ্বাস কৰিব নালাগে। মানুহে তেওঁলোকৰ টকা যাতে বিনা কাৰণত খৰচ নকৰে। মানুহ অসুস্থ হ'লে চিকিৎসকৰ ওচৰলৈ যাব লাগে আৰু চিকিৎসকৰ পৰামৰ্শ অনুসৰি ঔষধ গ্ৰহণ কৰিব লাগে।''

আৰু পঢ়কঃ বৰুণ সিং আইচিইউত; পিতৃৱে ক’লে ”মোৰ পুত্ৰ এজন যোদ্ধা, এই যুদ্ধত তেওঁ জয়ী হ’বই”