‘ইনচুলিন প্লাণ্ট’ৰ দ্বাৰা ডায়েবেটিছত উপকৃত হ’ব পাৰে, কিন্তু এই বিশেষ কথাকেইটা মনত ৰখাৰ দৰকাৰ

ডিজিটেল ডেস্ক : স্বাস্থ্য বিশেষজ্ঞসকলে বিশ্বজুৰি বৃদ্ধি পোৱা ডায়েবেটিছক এক ডাঙৰ সমস্যা হিচাপে অভিহিত কৰিছে। ভাৰততো যোৱা দুই দশক ধৰি ডায়েবেটিছ ৰোগীৰ সংখ্যা অতি দ্ৰুতগতিত বৃদ্ধি পাইছে। তথ্য অনুসৰি বৰ্তমান দেশৰ ৮ কোটিতকৈ অধিক লোক এই গুৰুতৰ আৰু জীৱন সংকটজনক স্বাস্থ্য সমস্যাৰ বলি হৈছে। চিকিৎসকে কয় যে যিদৰে এতিয়া কম বয়সীয়া লোকৰ ক্ষেত্ৰতো ডায়েবেটিছৰ সমস্যাটো ধৰা পৰিছে, ই আৰু অধিক চিন্তাৰ বিষয় হৈ পৰিছে। বিশেষজ্ঞসকলে আশংকা ব্যক্ত কৰিছে যে এই ৰোগ যি হাৰত বৃদ্ধি পাইছে, এনে পৰিস্থিতিত ২০৪৫ চনলৈকে দেশত ডায়েবেটিছ ৰোগীৰ সংখ্যা ১৩.৫ কোটি অতিক্ৰম কৰিব পাৰে।

 চিকিৎসকে কয় যে যদি আপুনি ডায়েবেটিছ ৰোগত আক্ৰান্ত তেন্তে ঔষধৰ লগতে জীৱনশৈলী আৰু খাদ্যাভ্যাসৰ প্ৰতি বিশেষ গুৰুত্ব দিব লাগিব। আনহাতে, ইয়াৰ ৰিস্ক ফেক্টৰ যেনে-ফেমিলি হিষ্ট্ৰী, মেদবহুলতাৰ সমস্যা থাকিলেও আপুনি অধিক সাৱধান হ’ব লাগে। ডায়েবেটিছ ৰোগেও শৰীৰৰ বহু অংশত সমস্যাৰ সৃষ্টি কৰিব পাৰে। ইফালে, এক অধ্যয়নত গৱেষকসকলে এনে এটা উদ্ভিদৰ বিষয়ে কৈছে, যাৰ পাত চোবাই খালে তেজৰ চেনিৰ মাত্ৰা বহু পৰিমাণে নিয়ন্ত্ৰণত ৰখাত সহায়ক হ’ব পাৰে। এই বিষয়ে বিতংভাৱে জানো আহক।

 ১. ইনচুলিন উদ্ভিদৰ পাত চোবাই খোৱাৰ উপকাৰিতা-

চিকিৎসকে কয় যে ঔষধৰ লগতে তেজৰ চেনিৰ মাত্ৰা নিয়ন্ত্ৰণত ৰাখিবলৈ অন্যান্য বিকল্প ব্যৱস্থা গ্ৰহণ কৰিব লাগে যদিও এই বিষয়ে চিকিৎসকৰ পৰামৰ্শ লোৱাটো অতি প্ৰয়োজন। আয়ুৰ্বেদত কিছুমান ঔষধ আছে যিবোৰে ব্লাডছুগাৰ নিয়ন্ত্ৰণত ৰাখে। Costus ignus নামৰ এই উদ্ভিদবিধক ইনচুলিন উদ্ভিদ বুলিও জনা যায় যদিও ইয়াত ইনচুলিন নাথাকে, ইয়াৰ উৎপাদনতো সহায় নকৰে, তথাপিও ইয়াৰ পাত চোবাই চেনি গ্লাইক’জেনলৈ ৰূপান্তৰিত কৰি বিপাকীয় ক্ৰিয়াত সহায় কৰে। এনেক্ষেত্ৰত ই ডায়েবেটিছ নিয়ন্ত্ৰণত সহায় কৰিব পাৰে।

 ২. ডায়েবেটিছ ৰোগীয়ে লাভ কৰিব পাৰে সুফল-

ইনচুলিন উদ্ভিদৰ পাত চোবাই খালে তেজত শৰ্কৰাৰ মাত্ৰা নিয়ন্ত্ৰণ কৰাত সহায়ক হয়। কাহ, চৰ্দি, ছালৰ সংক্ৰমণ, চকুৰ সংক্ৰমণ, হাওঁফাওঁৰ ৰোগ, হাঁপানী, জৰায়ুৰ সমস্যা, ডায়েৰিয়া আৰু কোষ্ঠকাঠিন্য আদি ৰোগত পূৰ্বতে এইবিধ উদ্ভিদ ব্যৱহাৰ কৰি আহিছে যদিও চিকিৎসকে কয় যে যদি আপোনাৰ ডায়েবেটিছৰ চিকিৎসা চলি আছে, তেন্তে চিকিৎসকৰ পৰামৰ্শ অবিহনে ইয়াক গ্ৰহণ নকৰিব, তেনে কৰিলে তেজৰ চেনি কমিলে গুৰুতৰ জটিলতা সৃষ্টি হ’ব পাৰে।

 ৩. অধ্যয়নে কি কয়?

কিছুমান গৱেষণাৰ পৰা অনুমান কৰিব পাৰি যে ইনচুলিন উদ্ভিদৰ পাতত প্ৰচুৰ পৰিমাণে কৰ্চলিক এচিড থাকে। এই ৰাসায়নিক পদাৰ্থই অগ্নাশয়ৰ পৰা ইনচুলিনৰ নিঃসৰণ বৃদ্ধি কৰে আৰু তেজত গ্লুক’জৰ মাত্ৰা নিয়ন্ত্ৰণ কৰাত সহায়ক হ’ব পাৰে। এই পাতবোৰ চোবাই বা পানীত উতলাই খাব পাৰি। কিন্তু বৰ্তমান সময়ত ই সকলো মানুহৰ বাবে উপকাৰী হয় নে নহয় সেয়া প্ৰমাণ কৰিব পৰাকৈ পৰ্যাপ্ত অধ্যয়ন হোৱা নাই।

 ৪. আয়ুৰ্বেদ বিশেষজ্ঞৰ পৰামৰ্শ-

আয়ুৰ্বেদ বিশেষজ্ঞসকলে কয় যে ইনচুলিন উদ্ভিদৰ পাতৰ বাহিৰেও কিছুমান অধ্যয়নত নিমপাত, তিতাগুটি, জামুন বীজ আদি সেৱন কৰিলেও ডায়েবেটিছ নিয়ন্ত্ৰিত হোৱা দেখা গৈছে। ইয়াৰ লগতে সুস্থ জীৱনশৈলী বজাই ৰখা, নিয়মীয়া ব্যায়ামৰ অভ্যাস গঢ়ি তোলাটোও ডায়েবেটিছ ৰোগীৰ বাবে অতি গুৰুত্বপূৰ্ণ বুলি বিবেচিত হৈছে।