ভাৰতৰ বিৰুদ্ধে এইবাৰ ৫০ শতাংশ শুল্ক ঘোষণা ট্রাম্পৰ

ডিজিটেল ডেস্কঃ আমেৰিকাৰ ৰাষ্ট্ৰপতি ড'নাল্ড ট্রাম্পে ভাৰতৰ বিৰুদ্ধে পুনৰ শুল্ক বোমাৰ বিস্ফোৰণ ঘটায়।

বুধবাৰে তেওঁ ভাৰতৰ বিৰুদ্ধে পুনৰ ২৫% অতিৰিক্ত শুল্ক আৰোপ কৰাৰ আদেশত স্বাক্ষৰ কৰে। ট্রাম্পে এই আদেশত স্বাক্ষৰ কৰি কয় যে ভাৰতে ৰাছিয়াৰ পৰা খাৰুৱা তেল ক্রয় কৰাটো অব্যাহত ৰখাৰ প্ৰত্যুত্তৰ হিচাপে এই অতিৰিক্ত ২৫% শুল্ক আৰোপ কৰা হৈছে।

ইয়াৰ লগে লগে আমেৰিকাই ভাৰতীয় সামগ্ৰীত আৰোপ কৰা শুল্কৰ হাৰ ৫০%লৈ বৃদ্ধি পায়। উল্লেখযোগ্য যে ট্রাম্পে ইয়াৰ আগতে ভাৰতীয় সামগ্ৰীত ২৫% শুল্ক আৰোপ কৰাৰ কথা ঘোষণা কৰিছিল।

ট্রাম্পে লগতে কয় যে এই আদেশ ২১ দিনৰ ভিতৰত অৰ্থাৎ অহা ২৭ আগষ্টৰ পৰা কাৰ্যকৰী কৰা হ'ব। অৱশ্যে যিবিলাক সামগ্রী ২৭ আগষ্টৰ আগতে আমেৰিকালৈ প্ৰেৰণ কৰা হৈছে আৰু ১৭ ছেপ্টেম্বৰৰ ভিতৰত আমেৰিকা পাবগৈ সেই সামগ্ৰীসমূহৰ ক্ষেত্ৰত এই আদেশ প্রযোজ্য নহ'ব। আদেশটোত স্পষ্টভাবে কোৱা হৈছে যে এই শুল্ক আন সকলো শুল্ক তথা কৰৰ অতিৰিক্ত হ'ব আৰু কিছুমান বিশেষ সামগ্ৰীৰ ক্ষেত্ৰত ৰেহাই দিয়া হ'ব পাৰে। উল্লেখযোগ্য যে ৰাছিয়াৰ পৰা খাৰুৱা তেলৰ ক্ৰয় অব্যাহত ৰাখি ভাৰতে ৰাছিয়াক ইউক্রেইন যুদ্ধত পুঁজিৰ যোগান ধৰি থকা বুলি কালি ভাৰতৰ বিৰুদ্ধে অভিযোগ কৰিছিল আৰু সেই কাৰণে তেওঁ ভাৰতৰ বিৰুদ্ধে ২৪ ঘণ্টাৰ ভিতৰত বৃহৎ হাৰত শুল্ক আৰোপৰ ভাবুকি দিছিল।

উৎসঃ দৈনিক জনমভূমি