৭ বছৰৰ মূৰত চীনলৈ যাব মোদী

ডিজিটেল ডেস্কঃ আমেৰিকাৰ সৈতে শুল্ক যুদ্ধ চলি থকাৰ সময়তে প্ৰধানমন্ত্ৰী নৰেন্দ্ৰ মোদীয়ে চীন ভ্ৰমণৰ সিদ্ধান্ত ঘোষণা কৰিছে। প্রধানমন্ত্রীয়ে ৩১ আগষ্ট আৰু ১ ছেপ্টেম্বৰত অনুষ্ঠিত হ'বলগীয়া শ্বাংহাই সহযোগিতা সংগঠনৰ (এছ চি অ') শীর্ষ সন্মিলনত অংশ গ্রহণ কৰিব।

প্রধানমন্ত্রীয়ে প্ৰথমতে ৩০ আগষ্টত জাপানলৈ গৈ তাত জাপান-ভাৰত শীর্ষ সন্মিলনত অংশ গ্রহণ কৰাৰ পাছত ৩১ আগষ্টত চীনলৈ ৰাওনা হ'ব। মন কৰিবলগীয়া যে প্ৰধানমন্ত্ৰীয়ে প্রায় সাত বছৰৰ পাছত চীন ভ্রমণ কৰিব। আনহাতে ২০২০ চনত গলৱান উপত্যকাত দুয়োখন দেশৰ সৈনিকৰ মাজত হোৱা সংঘৰ্ষৰ পাছত মোদীয়ে প্ৰথমবাৰলৈ চীন ভ্রমণ কৰিব।

প্রধানমন্ত্রীয়ে তেওঁৰ ১১ বছৰীয়া কাৰ্যকালত পঞ্চম বাৰলৈ চীন ভ্ৰমণ কৰিব। মন কৰিবলগীয়া যে ৰাছিয়াৰ পৰা খাৰুৱা তেল ক্ৰয়ৰ প্ৰসংগত ভাৰতে আমেৰিকা আৰু ইউৰোপীয়ান ইউনিয়নৰ দৰে পশ্চিমীয়া দেশবোৰত তথ্যসহকাৰে প্ৰত্যক্ষভাৱে প্ৰত্যুত্তৰ দিয়াৰ সময়তে ভাৰতে আমেৰিকা বিৰোধী দেশ চীন আৰু ৰাছিয়াৰ সৈতে নিজৰ সম্পৰ্ক অধিক ঘনিষ্ঠ কৰিবলৈ লৈছে।

ইয়াৰ দ্বাৰা ভাৰতে এই কথা স্পষ্ট কৰি দিয়ে যে এতিয়া দেশখন কোনো ৰাষ্ট্ৰ বা ৰাষ্ট্ৰ গোটৰ মাজত নিজকে আবদ্ধ কৰি ৰাখিবলৈ নিবিচাৰে। ভাৰতে নিজৰ ৰাষ্ট্ৰীয় স্বার্থকহে সর্বাধিক গুৰুত্ব দিয়ে।

আমেৰিকাৰ ৰাষ্ট্ৰপতি ড'নাল্ড ট্রাম্পৰ সৈতে শুল্ক যুদ্ধ চলি থকাৰ সময়তে মোদীৰ চীন আৰু জাপান ভ্ৰমণৰ সিদ্ধান্তই বিশেষ তাৎপর্য বহন কৰিছে। এছ চি অ' শীর্ষ সন্মিলনৰ মাজতে প্রধানমন্ত্ৰীয়ে চীনৰ ৰাষ্ট্ৰপতি ঝি জিনপিঙৰ সৈতে দ্বিপাক্ষিক আলোচনাত মিলিত হোৱাৰ সম্ভাৱনা আছে। দুয়োজন নেতা অন্তিমবাৰ মিলিত হৈছিল যোৱা বছৰ কজানত অনুষ্ঠিত ব্রিক্‌ছ শীর্ষ সন্মিলনৰ সময়ত। মোদীয়ে এছ চি অ' শীর্ষ সন্মিলনৰ সময়ত ৰাছিয়াৰ ৰাষ্ট্ৰপতি ভ্লাডিমিৰ পুটিনৰ সৈতে আলোচনাত মিলিত হোৱাৰ সম্ভানা আছে ।

উৎসঃ দৈনিক জনমভূমি