ইজৰাইল-আমেৰিকাৰ সৈতে যুদ্ধ অন্ত পেলাবলৈ ৩টা চৰ্ত বান্ধি দিলে ইৰানে

ডিজিটেল ডেস্ক: বৃহস্পতিবাৰে ত্রয়োদশ দিনত ভৰি দিয়া ইজৰাইল-আমেৰিকাৰ সৈতে ইৰানৰ যুদ্ধ অন্ত পেলাবলৈ ইৰানে তিনিটা চর্ত বান্ধি দিছে। সামাজিক মাধ্যম এক্সত ইৰানৰ ৰাষ্ট্ৰপতি মাচুদ পেজেছকিয়ানে কয়, 'ৰাছিয়া আৰু পাকিস্তানৰ নেতাৰ সৈতে কথা পাতি মই অঞ্চলটোৰ শান্তিৰ বাবে ইৰানৰ প্ৰতিশ্ৰুতিৰ কথা পুনৰ নিশ্চিত কৰিলোঁ।'

ইহুদী শাসক আৰু আমেৰিকাৰ দ্বাৰা প্ৰৰোচিত যুদ্ধ অন্ত পেলোৱাৰ একমাত্র উপায় হৈছে ইৰানৰ বৈধ অধিকাৰক স্বীকৃতি দিয়া, যুদ্ধৰ ক্ষতিপূৰণ দিয়া আৰু ভৱিষ্যতৰ আগ্রাসনৰ বিৰুদ্ধে দৃঢ় আন্তঃৰাষ্ট্ৰীয় নিশ্চয়তা। 

উল্লেখযোগ্য যে আমেৰিকা আৰু ইজৰাইলে যোৱা ২৮ ফেব্ৰুৱাৰীত ইৰান আক্রমণ আৰম্ভ কৰিছিল। উক্ত আক্ৰমণত দেশখনৰ সৰ্বোচ্চ নেতা, শীর্ষ সামৰিক কমাণ্ডাৰ আয়াতুল্লা চৈয়দ আলী খামেনেই আৰু বহু অসামৰিক নাগৰিকৰ মৃত্যু হৈছিল। তাৰ পাছতে ইছলামিক ৰিভলিউশ্যনেৰী গার্ড ক'ৰে ইজৰাইলৰ বিভিন্ন স্থান লক্ষ্য কৰি এক প্রতিশোধমূলক অভিযান আৰম্ভ কৰাৰ কথা ঘোষণা কৰিছিল। 

ৰাষ্ট্ৰসংঘত ইৰানৰ স্থায়ী প্রতিনিধি আমীৰ-চয়ীদ ইৰাৱানীৰ মতে আমেৰিকা-ইজৰাইলৰ আক্রমণত দেশখনত মহিলা আৰু শিশুকে ধৰি ১,৩৪৮জন অসামৰিক লোকৰ মৃত্যু হৈছে। আনহাতে, চলি থকা যুদ্ধত আহত হৈছে ১৭,০০০ৰো অধিক ।

উৎসঃ দৈনিক জনমভূমি